தமிழக ஆளுநரைக் கண்டித்து திமுக சாா்பில், தூத்துக்குடியில் செவ்வாய்க்கிழமை(ஜன.7) நடைபெறும் ஆா்ப்பாட்டத்தில் கட்சியினா் பங்கேற்குமாறு அமைச்சா்கள் பெ.கீதாஜீவன், அனிதா ஆா்.ராதாகிருஷ்ணன் ஆகியோா் அழைப்பு விடுத்துள்ளனா்.
இதுகுறித்து அவா்கள் வெளியிட்டுள்ள கூட்டறிக்கை: தமிழ்நாட்டையும், தமிழக மக்களையும், தமிழ்த்தாய் வாழ்த்தையும் அவமானப்படுத்தும் தமிழக ஆளுநரை கண்டித்து மாவட்ட தலைநகரங்களில் திமுக சாா்பில் செவ்வாய்க்கிழமை (ஜன.7) கண்டன ஆா்ப்பாட்டங்களை நடத்திட வேண்டும் என்று தலைமை கழகம் அறிவித்துள்ளது.
அதன்படி, தூத்துக்குடி சிதம்பரநகா் பேருந்து நிறுத்தம் அருகில் செவ்வாய்க்கிழமை காலை 10 மணிக்கு திமுக வடக்கு, தெற்கு மாவட்டங்கள் சாா்பில் கண்டன ஆா்ப்பாட்டம் நடைபெறும். இந்த ஆா்ப்பாட்டத்துக்கு, மாநகரச் செயலா் எஸ்.ஆா்.ஆனந்தசேகரன் தலைமை வகிக்கிறாா்.
இந்த ஆா்ப்பாட்டத்தில் கட்சி நிா்வாகிகள், தலைமை செயற்குழு, பொதுக்குழு உறுப்பினா்கள், அனைத்து செயலா்கள், நிா்வாகிகள், மாவட்ட பிரதிநிதிகள், சாா்பு அணிகளின் நிா்வாகிகள், தொண்டா்கள் உள்பட அனைவரும் பெருந்திரளாகப் பங்கேற்குமாறு கேட்டுக்கொள்கிறோம் என தெரிவித்துள்ளனா்.
