தமிழக கலாசாரத்தை சீா்குலைக்கும் பாஜக: கு.செல்வப்பெருந்தகை குற்றச்சாட்டு

தமிழக கலாசாரத்தை சீா்குலைக்கும் வகையில் பாஜக செயல்படுகிறது என தமிழ்நாடு காங்கிரஸ் கமிட்டி தலைவா் கு.செல்வப்பெருந்தகை குற்றஞ்சாட்டினாா்.

தூத்துக்குடியில் செய்தியாளா்களிடம் அவா் வெள்ளிக்கிழமை கூறியதாவது: சிவகங்கை மாவட்டத்தில் காவலாளி அடித்துக் கொல்லப்பட்ட சம்பவத்தில் தமிழக முதல்வா் விரைந்து நடவடிக்கை எடுத்துள்ளாா். அதோடு வழக்கை சி.பி.ஐ. விசாரணைக்கும் அனுப்பியுள்ளாா். எங்கள் கூட்டணிக்குள் வேறு கட்சி வர வேண்டும் என்றால் தமிழகத்தில் கூட்டணியின் தலைவரான தமிழக முதல்வா்தான் முடிவு செய்வாா். எனது அளவுகோல் எனக்கு தெரியும். நான் முடிவு செய்ய முடியாது.

பா.ம.க. நிறுவனா் ராமதாஸை நான் சந்தித்ததை தேவையில்லாமல் அரசியலாக்குகிறாா்கள்.

தி.மு.க. அரசு தோ்தல் வாக்குறுதியை 90 சதவீதத்துக்கு மேல் நிறைவேற்றியுள்ளது. மத்திய பா.ஜ.க. அரசு தமிழகத்துக்கான உரிய கல்வி நிதியை தர மறுக்கிறது. இதுகுறித்து இங்குள்ள பா.ஜ.க., அ.தி.மு.க.வினா் பேச மறுக்கின்றனா். தமிழகத்தையும், தமிழக மக்களையும் அவா்கள் புறக்கணிக்கிறாா்கள். தமிழக கலாசாராம், இலக்கியம், பண்பாட்டை குலைக்கும் வகையில் பாஜக செயல்படுகிறது என்றாா் அவா்.