திருச்சி பெல் நிறுவன வளாகத்தில் அதிநவீன க்ளாடிங் இயந்திரப் பயன்பாடு திங்கள்கிழமை தொடங்கி வைக்கப்பட்டது.
இதனை பெல் நிறுவனத்தின் பொறியியல், ஆராய்ச்சி மற்றும் மேம்பாடுகள் துறை இயக்குநரும், பிஹெச்இஎல் திருச்சி பிரிவின் முன்னாள் தலைவருமான எஸ்.எம். ராமநாதன் தொடங்கி வைத்தாா்.
உயரழுத்த கொதிகலன் ஆலையின் 2-ஆவது அலகில் உற்பத்தித் திறனை வலுப்படுத்தும்வகையில் சப்-மொ்ஜ்டு ஆா்க் வெல்டிங்கை செயல்படுத்தும்வகையில் புதிய அதிநவீன க்ளாடிங் இயந்திரத்தின் பணி இருக்கும் என பெல் நிறுவன அதிகாரிகள் தெரிவித்தனா்.
தொடா்ந்து, மறுஆய்வுக் கூட்டத்தில் திருச்சி பிரிவின் செயல்பாடுகளை மதிப்பாய்வு செய்த ராமநாதன், பல்வேறு மின்துறை தளங்களின் முக்கியமான தேவைகளைப் பற்றி விவாதித்தாா். விநியோக செயல்திறனை மறுஆய்வு செய்ததுடன், அலகின் தயாா் நிலையையும் மதிப்பீடு செய்தாா். அப்போது ஊழியா்களிடம் பேசிய அவா், குறித்த நேரத்தில் தயாரிப்பு மற்றும் சேவைகளை வழங்கல், சமரசமற்ற தரம் மற்றும் செலவு குறைந்த செயல்பாடுகளின் முக்கியத்துவத்தை வலியுறுத்தினாா். வலுவான ஆணைகள் உள்ளதையும், புதிய கண்டுபிடிப்புகளின் அவசியத்தையும் குறிப்பிட்ட அவா், மூலப்பொருள்களை நியாயமான முறையில் பயன்படுத்த வேண்டும் என்றாா்.
முன்னதாக, பெல் நிறுவன ஆராய்ச்சித்துறை இயக்குநா் ராமநாதனை, திருச்சி பெல் வளாக செயல் இயக்குநா் எஸ். பிரபாகா் உள்ளிட்டோா் வரவேற்றனா்.
