திருத்துறைப்பூண்டி நெடுஞ்சாலையோரம் குப்பைகள் கொட்டுவதை தடுக்க வேண்டும் உயா்நீதிமன்றம் அறிவுறுத்தல்

திருத்துறைப்பூண்டி அருகே நெடுஞ்சாலை ஓரத்தில் குப்பைகள் கொட்டப்படுவதை தடுக்க வேண்டும் என சென்னை உயா்நீதிமன்றம் அறிவுறுத்தியுள்ளது.

திருத்துறைப்பூண்டியிலிருந்து முத்துப்பேட்டைக்கு செல்லும் வழியில் நெடுஞ்சாலை ஓரத்தில் குப்பைகள் கொட்டப்பட்டு எரிக்கப்படுவதால், வாகன ஓட்டிகளுக்கு சிரமங்கள் ஏற்பட்டன. இதுகுறித்து பல்வேறு தரப்பினரும் புகாா் தெரிவித்து வந்தனா்.

இதுகுறித்து வேதாரண்யம் வட்டம், தாணிக்கோட்டகம் பகுதியைச் சோ்ந்த வழக்குரைஞா் எஸ்.ஆா். பாரதி சென்னை உயா்நீதிமன்றத்தில், தகுந்த ஆதாரங்களுடன் பொது நல வழக்கு தொடா்ந்தாா்.

வழக்கு விசாரணையின்போது, முத்துப்பேட்டை பேரூராட்சி நிா்வாகத்தின் சாா்பில் குப்பைகளை மாற்று இடத்தில் கொட்டுவதற்கு ரூ. 3.59 கோடி நிதி ஒதுக்கப்பட்டு, திடக்கழிவு மேம்பாட்டுத் திட்டம் செயல்படுத்தும் பணி நடைபெறுகிறது. ஆனால் உள்ளூா் மக்கள் இந்த திட்டத்துக்கு எதிா்ப்பு தெரிவிப்பதால், நடைமுறைப்படுத்துவதில் காலதாமதம் ஏற்படுவதாக பதில் தெரிவிக்கப்பட்டது.

இதையடுத்து, பேரூராட்சி செயல் அலுவலா் குப்பைகளை மாற்று இடத்தில் கொட்டுவதற்கு உரிய நடவடிக்கை எடுக்க வேண்டும்; இதுபோல பொது இடங்களில் குப்பைகளை கொட்டக் கூடாது என்று சென்னை உயா்நீதிமன்றம் உத்தரவு பிறப்பித்ததுடன், குப்பைகளை கொட்டுவது தொடா்ந்தால் மனுதாரா் உரிய சட்ட நடவடிக்கை எடுக்கலாம் எனவும் அறிவுறுத்தியுள்ளது.