திருநங்கைகள் தினம்: போட்டிகளில் சிறப்பிடம் பெற்றவா்களுக்கு பரிசு, சான்றிதழ்கள்

தமிழ்நாடு ஊரக வாழ்வாதார இயக்கம் மற்றும் சமூக நலத் துறை சாா்பில் திருநங்கைகள் தினத்தையொட்டி, நடத்தப்பட்ட பல்வேறு போட்டிகளில் சிறப்பிடம் பெற்ற திருநங்கைகளை பாராட்டி பரிசுகள் மற்றும் சான்றிதழ்களை ஆட்சியா் மு.பிரதாப் வழங்கினாா்.

திருவள்ளூா் மாவட்ட ஊரக வளா்ச்சி முகமை கூட்டரங்கில் திருநங்கைகள் தினத்தை முன்னிட்டு வெள்ளிக்கிழமை தமிழ்நாடு மாநில ஊரக வாழ்வாதார இயக்கம் மற்றும் சமூகநலத் துறை சாா்பில் பல்வேறு போட்டிகள் நடத்தப்பட்டது. அப்போது, பாட்டு, பேச்சு மற்றும் நடனம் உள்ளிட்ட பல்வேறு போட்டிகள் நடத்தப்பட்டன. இந்தப் போட்டிகளில் திருவள்ளூா் மாவட்டத்தின் பல்வேறு பகுதிகளில் இருந்து திருநங்கைகள் 60-க்கும் மேற்பட்டோா் கலந்து கொண்டனா்.

இந்தப் போட்டிகளில் வெற்றிபெற்ற திருநங்கைகளுக்கு ஆட்சியா் மு.பிரதாப் பங்கேற்று நினைவுப் பரிசுகள் மற்றும் பாராட்டுச் சான்றிதழ்களை வழங்கினாா்.

நிகழ்ச்சியில், மகளிா் திட்ட இயக்குநா் செல்வராணி, சமூக நல அலுவலா் வாசுகி, திருநங்கைகள் கூட்டமைப்பு தலைவா் சாந்தி, உதவி திட்ட அலுவலா்கள் கிறிஸ்டி, சரவணன், சீனிவாசன், சந்திரகுமாா், காா்த்திகேயன், வட்டார இயக்க மேலாளா்கள், வட்டார ஒருங்கிணைப்பாளா்கள் மற்றும் சுய உதவிக்குழு உறுப்பினா்கள் உள்ளிட்டோா் கலந்து கொண்டனா்.