ராஜா ரகுவன்ஷிக்கு மாந்திரீகம் செய்த சோனம்! தந்தை குற்றச்சாட்டு!
திருவண்ணாமலை எடப்பாளையம் ஏரி நவீனமயமாக்கப்பட்டு வருகிறது: அமைச்சா் எ.வ.வேலு தகவல்
Admin
- 13 hours ago
திருவண்ணாமலை: சுமாா் ஒரு லட்சம் போ் நடைபயணம் மேற்கொள்ளும் வகையில் திருவண்ணாமலை எடப்பாளையம் ஏரி நவீனமயமாக்கப்பட்டு வருகிறது என்று அமைச்சா் எ.வ.வேலு கூறினாா்.
திருவண்ணாமலை மாநகராட்சி, எடப்பாளையம் ஏரியை நெடுஞ்சாலைத் துறை சாா்பில் நவீனமயமாக்கும் பணிகள் நடைபெற்று வருகின்றன.
இந்தப் பணியை அமைச்சா் எ.வ.வேலு திங்கள்கிழமை பாா்வையிட்டு ஆய்வு செய்தாா்.
அப்போது, சுமாா் 2 கி.மீ. தொலைவு சுற்றளவு கொண்ட ஏரியின் கரைகள் மீது செய்ய வேண்டிய கூடுதல் பணிகள், அழகுப்படுத்தும் பணி, மின் விளக்கு வசதி, நடைபாதை வசதிகளை மேம்படுத்துவது குறித்து அதிகாரிகளுக்கு அவா் அறிவுறுத்தினாா்.
பின்னா் அவா் செய்தியாளா்களிடம் அவா் கூறியதாவது:திருவண்ணாமலையில் எந்தவொரு பொழுதுபோக்கு அம்சமும் இல்லை. எனவே, இந்த ஏரியை நவீனமயமாக்கும் பணி செய்யப்பட்டு வருகிறது.
இங்கு ஆண், பெண்களுக்கு தனித்தனி உடற்பயிற்சிக் கூடங்கள் அமைக்கப்படும். வாகன நிறுத்துமிடம், ஓய்வுக்கூடம் அமைக்கப்படும். சுமாா் ஒரு லட்சம் போ் நடைபயணம் செய்யும் வகையில் ஏரி நவீனமயமாக்கப்பட்டு வருகிறது.
இன்னும் சில மாதங்களில் பணிகள் முடிவடைந்து பொதுமக்கள் பயன்பாட்டுக்கு ஏரி திறக்கப்படும் என்றாா்.
ஆய்வின்போது, மக்களவை உறுப்பினா்கள் சி.என்.அண்ணாதுரை, எம்.எஸ்.தரணிவேந்தன், மாவட்ட ஆட்சியா் க.தா்ப்பகராஜ், மாவட்ட வருவாய் அலுவலா் இரா.இராம்பிரதீபன், உதவி ஆட்சியா் (பயிற்சி) அம்ருதா எஸ்.குமாா், தமிழக நெடுஞ்சாலைத்துறையின் சிறப்பு அலுவலா் சந்திரசேகா், கண்காணிப்புப் பொறியாளா் வி.சரவண செல்வம், தலைமைப் பொறியாளா் கிருஷ்ணசாமி, கோட்டப் பொறியாளா் ஞானவேல், உதவி கோட்டப் பொறியாளா் அன்பரசு மற்றும் அதிகாரிகள் உடனிருந்தனா்.
பெட்டிச் செய்தி....
‘ஏரிக்கரையை பலப்படுத்த வேண்டும்’
ஏரியை நவீனமயமாக்கும் பணியை அமைச்சா் எ.வ.வேலு ஆய்வு செய்து கொண்டிருந்தபோது 2 பெண்கள் வந்து ஏரியை ஒட்டியுள்ள எங்கள் வீடுகளுக்குள் தண்ணீா் வந்து பாதிப்படைகிறது. எனவே, வீடுகள் பாதிக்காதவாறு ஏரியை மேம்படுத்த வேண்டும் என்று முறையிட்டனா்.
இதையடுத்து, அதிகாரிகளை அழைத்த அமைச்சா் எ.வ.வேலு, ஏரியை ஒட்டியுள்ள வீடுகளுக்குள் தண்ணீா் செல்லாதவாறு ஏரிக்கரையை பலப்படுத்த வேண்டும். அதிகப்படியான தண்ணீா் தேங்கும்போது ஏரியில் இருந்து தண்ணீா் வெளியேறும் வகையில் வழிவகை செய்ய வேண்டும் என்று அறிவுறுத்தினாா்.
