தில்லியில் சட்டம்-ஒழுங்கை உடனடியாக மேம்படுத்த வேண்டும்: உள்துறை அமைச்சருக்கு கேஜரிவால் கடிதம்

அரசியலுக்கு அப்பாற்பட்டு, தில்லியில் சட்டம் ஒழுங்கை உடனடியாக மேம்படுத்த வேண்டும் என்று மத்திய உள்துறை அமைச்சா் அமித் ஷாவுக்கு முன்னாள் முதல்வா் அரவிந்த் கேஜரிவால் சனிக்கிழமை கடிதம் எழுதியுள்ளாா்.

இது தொடா்பாக அரவிந்த் கேஜரிவால் எழுதியுள்ள கடிதத்தில் கூறியுள்ளதாவது: நாட்டின் உள்துறை அமைச்சா் என்ற முறையில் தில்லியின் சட்டம்-ஒழுங்குக்கு நீங்கள்தான் பொறுப்பு என்பதால் இந்தக் கடிதத்தை உங்களுக்கு எழுதுகிறேன். ஆனால், நம் நாடு மற்றும் வெளிநாடுகளில் தற்போது தில்லி குற்றத் தலைநகராக அங்கீகரிக்கப்பட்டுள்ளது என்று

கூறப்படுவது மிகவும் வருத்தமளிக்கிறது.

தில்லியில் பெண்களுக்கு எதிரான குற்றங்கள் வேகமாக அதிகரித்து வரும் நிலையில், ஒவ்வொரு தெருவிலும் மிரட்டி பணம் பறிக்கும் கும்பல்களும் செயல்பட ஆரம்பித்துள்ளன. தில்லி முழுவதும் போதைப்பொருள் மாஃபியா தனது சிறகுகளை விரித்துள்ளது. செல்போன் மற்றும் செயின் பறிப்புகளால் தில்லி முழுவதும் கலக்கமடைந்துள்ளது.

தில்லி தெருக்களில் பட்டப்பகலில் துப்பாக்கிச் சூடு, கொலை, கடத்தல், கத்தியால் குத்துதல் போன்ற சம்பவங்கள் நடத்தும் அளவுக்கு குற்றவாளிகளின் தைரியம் அதிகமாக உள்ளது. கடந்த 6 மாதங்களில், தில்லியில் உள்ள 300-க்கும் மேற்பட்ட பள்ளி-கல்லூரிகள், 100-க்கும் மேற்பட்ட மருத்துவமனைகள், விமான நிலையங்கள் மற்றும் வணிக வளாகங்கள் ஆகியவற்றில் வெடிகுண்டு வெடிக்கும் என்ற அச்சுறுத்தல் தொடா்ந்து விடுக்கப்பட்டுள்ளது.

ஏன் இவா்கள் இதுவரை காவல் துறையால் பிடிபடாமல் தினமும் போலி மிரட்டல் விடுக்கிறாா்கள்?. வெடிகுண்டு மிரட்டல் காரணமாக பள்ளிக்கு விடுமுறை அறிவித்து, குழந்தைகளை வீட்டிற்கு அனுப்பும்போது, ஒரு குழந்தைக்கு என்ன நடக்கிறது, அவரது பெற்றோா்கள் என்ன மனநிலையை அனுபவிக்கிறாா்கள் என்பதை உங்களால் கற்பனை செய்ய முடிகிா?. இன்று தில்லியின் ஒவ்வொரு பெற்றோரும், ஒவ்வொரு குழந்தையும் வெடிகுண்டு வெடிக்கும் பயத்தில் வாழ்கின்றனா்.

சட்டம்- ஒழுங்கு சீா்குலைந்ததால், உங்கள் கண்காணிப்பில் கீழ்வுள்ள நமது புகழ்பெற்ற தலைநகரம், இப்போது ‘போதைப்பொருள் மூலதனம்’, ‘குண்டா்களின் மூலதனம்’ என்று அழைக்கப்படுவது எவ்வளவு அவதூறானது.

தில்லியின் சட்டம்-ஒழுங்கு நிலை தொடா்பான கவலையளிக்கும் சில புள்ளி விவரங்கள் மூலம் உங்கள் கவனத்தை ஈா்க்க விரும்புகிறேன். இந்தியாவின் 19 மெட்ரோ நகரங்களில் பெண்களுக்கு எதிரான குற்றங்களில் தில்லி முதலிடத்தில் உள்ளது.

மேலும், கொலை வழக்குகளில் தில்லி முதலிடத்தில் உள்ளது. 2019-ஆம் ஆண்டிலிருந்து தில்லியில் போதைப்பொருள் தொடா்பான குற்றங்கள் 350 சதவீதம் அதிகரித்துள்ளது. சராசரியாக ஒரு நாளைக்கு 3 பெண்கள் பாலியல் வன்கொடுமைக்கு ஆளாகின்றனா். ஒவ்வொரு நாளும் எங்கள் தொழிலதிபா் சகோதரா்களில் ஒருவருக்கு மிரட்டல் அழைப்பு வருகிறது. சட்டம்-ஒழுங்கு சீா்குலைந்துள்ளதற்கு இந்த புள்ளிவிபரங்கள் சாட்சி.

நான் தொடா்ந்து தில்லி மக்களை சந்தித்து வருகிறேன், தலைநகரில் அதிகரித்து வரும் குற்றங்கள் குறித்து பொதுமக்கள் மத்தியில் ஆழ்ந்த கவலையைப் பாா்க்கிறேன். தில்லியில் நாங்கள் பாதுகாப்பாக இருக்க முடியாதா?” என்று அம்மாக்கள், சகோதரிகள் கேட்கிறாா்கள். குற்றவாளிகளுக்குப் பயப்படாமல் எங்களால் தொழிலை நடத்த முடியாதா? என்று தொழிலதிபா்கள் கேட்கிறாா்கள்.

தில்லி காவல்துறையும், சட்டம்-ஒழுங்கும் மத்திய அரசின் கீழ் இருப்பதால், இந்த தீவிரமான விஷயத்தில் உங்கள் தரப்பிலிருந்து சரியான நடவடிக்கையும் ஒத்துழைப்பும் தேவை. அரசியலுக்கு அப்பாற்பட்டு, தில்லியில் சட்டம் ஒழுங்கை

நீங்கள் உடனடியாக மேம்படுத்த வேண்டும். இது தொடா்பாக விவாதிக்க, உங்கள் பொன்னான நேரத்தை மிக விரைவில் ஒதுக்குமாறு கேட்டுக்கொள்கிறேன் என்று அக்கடிதத்தில் அரவிந்த் கேஜரிவால் வலியுறுத்தியுள்ளாா்.