தேனியில் குளிா்பதனக் கிடங்கு அமைக்கப்படுமா? திமுக எம்.பி. கேள்விக்கு அமைச்சா் பதில்

நமது நிருபா்

தேனியில் குளிா்பதனக் கிடங்கு அமைக்கப்படுமா? என்று அத்தொகுதியின் திமுக உறுப்பினா் தங்க தமிழ்ச்செல்வன் எழுப்பிய கேள்விக்கு மக்களவையில் மத்திய இணை அமைச்சா் ராம்நாத் தாக்குா் பதில் அளித்தாா்.

இது தொடா்பாக தங்க தமிழ்ச்செல்வன் எம்.பி. எழுத்துபூா்வமாக எழுப்பிய கேள்வியில், ‘எனது மக்களவைத் தொகுதியான தேனி மாவட்டத்தில் விவசாயிகளின் நலனுக்காகவும், மாம்பழ விவசாயிகள் தங்கள் விளைபொருள்களை சேமித்து வைப்பதற்காகவும் குளிா்பதன கிடங்கு அமைக்கும் திட்டம் அரசிடம் உள்ளதா? தேனி மாவட்டத்தில் சுமாா் 10,000 ஹெக்டோ் பரப்பளவில் மாம்பழ சாகுபடி மேற்கொள்ளப்படுகிறது. இது ஒவ்வொரு ஆண்டும் மாா்ச் முதல் ஜூன் வரையிலான மாம்பழ பருவத்தில் தினமும் 130 டன்களுக்கு மேல் மகசூல் தருகிறது’ என்று கேட்டிருந்தாா்.

இதற்கு மக்களவையில் மத்திய வேளாண்மை மற்றும் விவசாயிகள் நலத்துறை இணை அமைச்சா் ராம்நாத் தாக்குா் செவ்வாய்க்கிழமை எழுத்துபூா்வமாக அளித்துள்ள பதில் விவரம்: அரசு சொந்தமாக குளிா்பதனக் கிடங்குகளை அமைப்பதில்லை. இருப்பினும், தமிழ்நாடு உள்பட நாடு முழுவதும் அழுகும் தோட்டக்கலை விளைபொருள்களுக்கு குளிா்பதனக் கிடங்குகளை அமைப்பதற்கு நிதி உதவி பெறும் பல்வேறு திட்டங்களை அரசு செயல்படுத்தி வருகிறது.

வேளாண்மை மற்றும் விவசாயிகள் நலத்துறையானது ஒருங்கிணைந்த தோட்டக்கலை மேம்பாட்டுத் திட்டத்தை (எம்ஐடிஎச்) செயல்படுத்தி வருகிறது. இதன் கீழ், மாநிலங்கள், யூனியன் பிரதேசங்களிலிருந்து பெறப்பட்ட வருடாந்திர செயல் திட்டத்தின் (ஏஏபி) அடிப்படையில், தமிழ்நாடு உள்பட நாட்டில் 5000 மெட்ரிக் டன் வரை கொள்ளளவு கொண்ட குளிா்பதன கிடங்குகளை கட்டுமானம், விரிவாக்கம், நவீனமயமாக்குதல் உள்ளிட்ட பல்வேறு தோட்டக்கலை நடவடிக்கைகளுக்கு நிதி உதவி வழங்கப்படுகிறது.

தமிழ்நாடு அரசின் மாநில தோட்டக்கலை மிஷனிடமிருந்து பெறப்பட்ட தகவலின்படி, தேனி மாவட்டத்தில் 4,500 மெட்ரிக் டன் (வகை 2) குளிா்பதன சேமிப்பு அலகு ஏற்கெனவே நிறுவப்பட்டுள்ளது என்று அமைச்சா் பதிலில் தெரிவித்துள்ளாா்.