தமிழ் சினிமாவில் பல முன்னணி நடிகர்களுக்கு ஜோடியாக நடித்து பிரபலமானவர் நடிகை சீதா. இவர் விருகம்பாக்கம் புஷ்பா காலனியில் வசித்து வருகிறார். இந்தநிலையில் விருகம்பாக்கம் காவல் நிலையத்தில் அவர் புகார் ஒன்றை அளித்துள்ளார். அந்தப் புகாரில் ``கடந்த அக்டோபர் 31-ம் தேதி, என்னுடைய தம்பியின் மனைவி கல்பனா, நிகழ்ச்சிக்கு ஒன்று சென்றுவிட்டு என்னுடைய வீட்டுக்கு வந்தார். அப்போது அவர், அணிந்திருந்த 4 1/2 சவரன் ஜிமிக்கி, செயின் உள்ளிட்ட நகைகளை வீட்டில் கழற்றி வைத்துவிட்டு தூங்கினார்.
பின்னர், அவர் கண்விழித்து பார்த்தபோது அந்த நகைகளைக் காணவில்லை. எனவே அந்த நகைகளை யாராவது திருடியிருக்கலாம் என்ற சந்தேகம் உள்ளது. எனவே நகைகளை மீட்டு தருவதோடு அதை திருடியவர்கள் மீது சட்டப்படி நடவடிக்கை எடுக்க வேண்டும்'' என்று குறிப்பிட்டிருந்தார். அதன்பேரில் விருகம்பாக்கம் போலீஸார் விசாரணை நடத்தி வருகின்றனர். சம்பவத்தன்று நடிகை சீதாவின் வீட்டுக்கு யார், யார் வந்து சென்றார்கள் என்ற விவரம் அடிப்படையில் விசாரணை நடத்தப்பட்டு வருகிறது. அதோடு சி.சி.டி.வி பதிவுகளையும் போலீஸார் ஆய்வு செய்து வருகிறார்கள்.
