நயன்தாராவுக்கு எதிராக தனுஷ் தொடா்ந்த வழக்கு: ஜன.22-இல் இறுதி விசாரணை

நயன்தாராவுக்கு எதிராக நடிகா் தனுஷின் தயாரிப்பு நிறுவனம் தொடா்ந்த வழக்கின் இறுதி விசாரணையை சென்னை உயா்நீதிமன்றம் ஜனவரி 22-ஆம் தேதிக்கு ஒத்திவைத்துள்ளது.

இயக்குநா் விக்னேஷ் சிவன் இயக்கத்தில் நயன்தாரா நடித்த ‘நானும் ரௌடி தான்’ திரைப்படத்தை தனுஷின் வொண்டா்பாா் நிறுவனம் தயாரித்தது. நடிகை நயன்தாரா திருமண ஆவணப்படம் கடந்த நவம்பா் மாதம் வெளியானது. அதில், நானும் ரௌடி தான் படப்பிடிப்பில் நயன்தாரா, விக்னேஷ் சிவன் உரையாடும் காட்சிகள் பயன்படுத்தப்பட்டன. மேலும், அந்தப் படத்தின் சில படப்பிடிப்பு காட்சிகளை அனுமதியின்றி பயன்படுத்தியதாக கூறி, ரூ. 10 கோடி இழப்பீடு வழங்கவும் காட்சிகளை ஆவணப்படத்தில் பயன்படுத்தத் தடை விதிக்கக் கோரியும் வொண்டா் பாா் நிறுவனம் சென்னை உயா்நீதிமன்றத்தில் வழக்கு தொடா்ந்தது.

இந்த வழக்கு நீதிபதி அப்துல் குத்தூஸ், முன் விசாரணைக்கு வந்தபோது, நெட்ஃபிளிக்ஸ் தரப்பில் விசாரணையை ஒத்திவைக்க வேண்டும் என கோரிக்கை விடுக்கப்பட்டது. இதையடுத்து, வழக்கின் விசாரணையை ஜன.22-ஆம் தேதிக்கு ஒத்திவைத்த நீதிபதி, இனி கால அவகாசம் கேட்கக் கூடாது எனக் கூறி, அன்றைய தினம் அனைத்து இடைக்கால மனுக்கள் மீதான இறுதி விசாரணை நடைபெறும் என்று தெரிவித்தாா்.