Ind v Eng: 'அஷ்வினுடன் என்னை ஒப்பிடுவதே பெருமைதான்!'- சேப்பாக்கத்தில் வருண் சக்கரவர்த்தி நெகிழ்ச்சி

இந்தியா இங்கிலாந்து இடையேயான முதல் டி20 போட்டி கொல்கத்தாவில் நடந்திருந்தது. இந்திய அணி 7 விக்கெட் வித்தியாசத்தில் வென்றிருந்தது. இந்நிலையில், இரண்டாவது டி20 போட்டி சென்னை சேப்பாக்கத்தில் நாளை நடைபெறவிருக்கிறது. போட்டிக்கு முன்பான பத்திரிகையாளர் சந்திப்புக்கு தமிழக வீரரான வருண் சக்கரவர்த்தி வருகை தந்திருந்தார்.

அவர் பேசுகையில், 'ரொம்ப நாட்கள் கழித்து சென்னையில் ஆடப்போகிறேன். உள்ளூர் மக்களுக்கு முன்பாகவும் பெற்றோருக்கு முன்பாகவும் ஆடுவதில் பெரும் மகிழ்ச்சி.டி20 இல் ஒரு அணியாக நாங்கள் சிறப்பாக செயல்பட்டு வருகிறோம். பென்ச்சிலுமே திறமையான வீரர்கள் நிறையவே இருக்கிறார்கள்.சரியான நேரத்தில் இந்திய அணியில் வாய்ப்பு கிடைக்கும் என்பதில் எனக்கு உடன்பாடில்லை. நாம் எப்போதுமே தயாராக இருக்க வேண்டும். 2021 ஆம் ஆண்டுக்கு பிறகு என்னை அணியிலிருந்து டிராப் செய்தார்கள்.

அது என்னை இன்னும் உழைக்க வைத்தது. இன்னும் என்னுடைய பந்துவீச்சில் மாற்றங்களை கொண்டு வர வைத்தது.ஒரு பேட்டர் ஆடும் விதத்தை பற்றி நிறைய வீடியோக்களை பார்ப்பேன். அவர்கள் என்ன மாதிரியான ஷாட்களை ஆடுகிறார் என ஆய்ந்து அதற்கேற்ப அவருக்கு எதிரான திட்டங்களை தீட்டுவேன்.

அஷ்வினோடு என்னை ஒப்பிட்டு பேசுவதே பெருமையாக இருக்கிறது. அஷ்வின் மூன்று பார்மட்களிலும் இந்திய அணிக்காக ஆடியவர்.

நான் ஒரே ஒரு பார்மட்டில்தான் ஆடி வருகிறேன். இப்போதுதான் கம்பேக் கொடுத்திருக்கிறேன். அஷ்வினுடன் ஒப்பிடும் அளவுக்கு நான் வளரவில்லை. நீண்ட காலத்திற்கு இந்திய அணியில் ஆட என்ன செய்ய வேண்டுமோ அதில்தான் என்னுடைய கவனம் முழுவதும் இருக்கிறது.போட்டிக்கு முன்பாக திட்டமிடுவதில்தான் அனலிஸ்டுகளுடன் அதிகமான நேரத்தை செலவிடுவேன்.

பயிற்சியாளர் கவுதம் கம்பீரும் சூர்யகுமார் யாதவும் என் மீது எந்த விதமான அதீத அழுத்தமும் ஏறாமல் பார்த்துக் கொள்கிறார்கள்.

கடந்த 6-7 மாதங்களாக பேட்டிங்கிலும் தீவிர பயிற்சியில் ஈடுபட்டு வருகிறேன். கொல்கத்தாவுக்கு ஆடிய போது அபிஷேக் நாயரிடமிருந்துதான் தீவிரமாக பேட்டிங்கை கற்றுக்கொள்ள ஆரம்பித்தேன். இன்னும் நிறையவே கற்றுக்கொள்ள வேண்டும்.' என்றார் வருண் சக்கரவர்த்தி.

இந்தியா வென்ற முதல் போட்டியில் வருண் சக்கரவர்த்திதான் ஆட்டநாயகன் விருதை பெற்றிருந்தார் என்பது குறிப்பிடத்தக்கது.