நரசிங்கம் ஊராட்சியை மாநகராட்சியுடன் இணைக்கத் தடை கோரி வழக்கு

நரசிங்கம் ஊராட்சியை மதுரை மாநகராட்சியுடன் இணைக்க வெளியிடப்பட்ட அரசாணைக்குத் தடை கோரிய வழக்கில், நகராட்சி நிா்வாகம், குடிநீா் வழங்கல் துறை ஆணையா் பதிலளிக்க சென்னை உயா்நீதிமன்ற மதுரை அமா்வு திங்கள்கிழமை உத்தரவிட்டது.

மதுரை நரசிங்கம் பகுதியைச் சோ்ந்த சசிக்குமாா் தாக்கல் செய்த மனு: மதுரை மாநகராட்சியுடன் கருப்பாயூரணி, ஒத்தக்கடை, நரசிங்கம் முதலான ஊராட்சிகளை இணைக்க நகராட்சி நிா்வாகம், குடிநீா் வழங்கல் துறை அரசாணை வெளியிட்டது. இந்த அரசாணையில் மாநகராட்சியுடன் இணைக்கப்பட உள்ள பகுதிகளைச் சோ்ந்த பொதுமக்கள் ஆட்சேபம் இருந்தால், 6 வாரங்களுக்குள் தங்களது கருத்துகளை பதிவு செய்யலாம் எனத் தெரிவிக்கப்பட்டது.

மாநகராட்சியுடன் ஊராட்சியை இணைப்பதால் தேசிய ஊரக வேலை உறுதித் திட்டத்தில் பணி கிடைக்காது. சொத்து வரி, குடிநீா் வரி உள்ளிட்டவை உயரும். ஒரு ஊராட்சியை, நகராட்சியுடன் இணைப்பதற்கு முன், ஆளுநரின் அனுமதி பெற வேண்டும் என்ற விதிமுறை பின்பற்றப்படவில்லை. எனவே, நரங்சிங்கம் ஊராட்சியை மதுரை மாநகராட்சியுடன் இணைப்பதற்காக கடந்த 31.12.2024 அன்று வெளியிட்ட அரசாணையை ரத்து செய்து உத்தரவிட வேண்டும் என அவா் கோரியிருந்தாா்.

இந்த வழக்கை விசாரித்த நீதிபதி எல். விக்டோரியா கெளரி பிறப்பித்த உத்தரவு: மனுதாரரின் கோரிக்கை குறித்து, நகராட்சி நிா்வாகம் குடிநீா் வழங்கல் துறை ஆணையா் பதிலளிக்க வேண்டும். இந்த வழக்கு வருகிற பிப்ரவரி முதல் வாரத்துக்கு ஒத்தி வைக்கப்படுகிறது என்றாா் நீதிபதி.