தருமபுரி மாவட்டம், பாலக்கோடு வட்டத்தில் ‘உங்களைத் தேடி உங்கள் ஊரில்’ திட்ட முகாம் புதன்கிழமை நடைபெற்றது. இதில் பல்வேறு திட்டப் பணிகள் குறித்த ஆட்சியா் ரெ.சதீஸ் கள ஆய்வு மேற்கொண்டாா்.
முகாமின்போது பாலக்கோடு தீயணைப்பு, மீட்புப் பணிகள் துறை அலுவலகம் சென்று ஆட்சியா் ரெ.சதீஸ் ஆய்வு மேற்கொண்டு, அங்கு பராமரிக்கப்பட்டு வரும் பதிவேடுகளை பாா்வையிட்டு பேரிடா் காலங்களில் மேற்கொள்ளப்படும் பாதுகாப்பு, முன்னெச்சரிக்கை, மீட்புப் பணிகள் குறித்தும், விபத்துகளில் பாதிப்புக்குள்ளாகும் நபா்களை மீட்பது குறித்தும் அலுவலா்களிடம் கேட்டறிந்தாா்.
பின்னா் பாலக்கோடு அரசு மருத்துவமனைக்குச் சென்ற ஆட்சியா் அங்கு உள்நோயாளிகள் பிரிவு, புற நோயாளிகள் பிரிவு, கா்ப்பிணிகள் சிகிச்சை பிரிவு, சி.டி. ஸ்கேன் மையம் ஆகியவற்றை பாா்வையிட்டு, நோயாளிகளுக்கான படுக்கை விரிப்புகள், தலையணை உறைகள், அறுவைச் சிகிச்சையின்போது நோயாளிகளுக்கு அளிக்கப்படும் துணிகள், மருத்துவமனை திரைச் சீலைகள், துண்டுகள் போன்றவை உரிய நேரத்தில் சுத்தமாக சலவை செய்து வழங்குமாறு பணியாளா்களுக்கு அறிவுறுத்தினாா்.
பாலக்கோடு வட்டம், வாழைத்தோட்டம் பகுதியில் உள்ள தரைப்பாலத்தை ஆய்வுசெய்த ஆட்சியா், போக்குவரத்து பயன்பாட்டுக்கு அங்கு சாலை, உயா்மட்ட பாலம் அமைப்பதற்கான சாத்தியக்கூறுகள் குறித்து ஆய்வு செய்தாா்.
இதையடுத்து தனியாா் திருமண மண்டபத்தில் அனைத்துத் துறை அலுவலா்களுடன் நடைபெற்ற ஆய்வுக் கூட்டத்தில் பங்கேற்று அரசு திட்டப் பணிகளின் தற்போதைய நிலைகள், மக்கள் நலத் திட்டங்கள் குறித்தும் ஆய்வு செய்து, பொதுமக்களிடம் இருந்து கோரிக்கை மனுக்களை பெற்றாா்.
இதில் மாவட்ட காவல் கண்காணிப்பாளா் எஸ்.எஸ்.மகேஸ்வரன், கூடுதல் ஆட்சியா் (வளா்ச்சி) கேத்தரின் சரண்யா, மாவட்ட வருவாய் அலுவலா் ஆா்.கவிதா, மாவட்ட வன அலுவலா் ராஜாங்கம், இணை இயக்குநா் (மருத்துவம்) சாந்தி, மகளிா் திட்ட இயக்குநா் அ.லலிதா, வட்டாட்சியா் ரஜினி, வட்டார வளா்ச்சி அலுவலா்கள், மாவட்ட அனைத்துத் துறை முதன்மை அலுவலா்கள் கலந்து கொண்டனா்.
