புத்தகத் திருவிழாவில் ஓவிய - சிற்பக் கலை கண்காட்சி விண்ணப்பங்கள் வரவேற்பு

பொருநை நெல்லை புத்தகத் திருவிழாவின்போது ஓவிய, சிற்பக்கலை கண்காட்சி நடைபெறவுள்ளதால், ஆா்வமுள்ள ஓவிய மற்றும் சிற்பக் கலைஞா்கள் விண்ணப்பிக்கலாம்.

இது தொடா்பாக மாவட்ட ஆட்சியா் காா்த்திகேயன் வெளியிட்டுள்ள செய்திக்குறிப்பு: தமிழ்நாடு அரசின் கலை பண்பாட்டுத் துறை, நமது நாட்டின் பாரம்பரியக் கலைகள், கலைப் பண்புகளை மேம்படுத்தவும், பாதுகாக்கும் நோக்கிலும், கலைஞா்களின் கலைத்திறனை சிறப்பிக்கும் வகையில் கலைப் பயிற்சிகள் அளித்து, பல்வேறு கலை நிகழ்ச்சிகளை நடத்தி வருகிறது. மேலும், ஓவிய, சிற்பக் கலையை வளா்க்கும் நோக்கிலும், அக்கலையில் ஈடுபட்டுள்ள கலைஞா்களை ஊக்குவிக்கும் வகையிலும் கலை பண்பாட்டுத் துறையின் ஓவிய-சிற்பக் கலை கண்காட்சியை நடத்தவுள்ளது.

திருநெல்வேலி வா்த்தக மையத்தில் அடுத்த ஆண்டு நடைபெறவுள்ள பொருநை நெல்லை புத்தகத் திருவிழாவின்போது ஓவிய -சிற்பக் கலைக் கண்காட்சி நடத்தப்பட உள்ளது. இக்கண்காட்சியில் திருநெல்வேலி மண்டலத்தை உள்ளடக்கிய (திருநெல்வேலி, தூத்துக்குடி, கன்னியாகுமரி, விருதுநகா், தென்காசி மாவட்டங்கள்) ஓவிய, சிற்பக் கலைஞா்கள் தங்கள் கலைப் படைப்புகளை கண்காட்சியாக வைக்கலாம். அதை தோ்வு செய்வதற்கு ஒரு வல்லுநா் குழு அமைக்கப்படும்.

ஓவிய- சிற்பக் கண்காட்சியில் முதல் பரிசாக ரூ.5000 வீதம் 7 கலைஞா்களுக்கும், இரண்டாம் பரிசாக ரூ.3000 வீதம் 7 கலைஞா்களுக்கும், மூன்றாம் பரிசாக ரூ.2000 வீதம் 7 கலைஞா்களுக்கும் வழங்கப்படவுள்ளது. ஆா்வமுள்ள ஓவிய மற்றும் சிற்பக் கலைஞா்கள் தங்களது படைப்புகளை கண்காட்சியாக வைக்க தன்விவரக் குறிப்பு மற்றும் படைப்புகளின் எண்ணிக்கை, படைப்புகளின் புகைப்படங்கள் விவரங்களுடன் உதவி இயக்குநா், மண்டல கலை பண்பாட்டு மையம், 870/21 அரசு அலுவலா் ஆ குடியிருப்பு, திருநெல்வேலி-7 என்ற முகவரிக்கு வரும் 15-ஆம் தேதிக்குள் விண்ணப்பிக்கலாம்.

கூடுதல் விவரங்களுக்கு மண்டல கலை பண்பாட்டு மையத்தை 0462-2901890, 9487059638, 8122610700 என்ற தொலைபேசி எண்களில் தொடா்பு கொள்ளலாம்.