புறாவைப் பிடிக்க முயன்ற மாணவா் தவறி விழுந்து உயிரிழப்பு

வீட்டின் கூரை மீது இருந்த புறாவைப் பிடிக்க முயன்ற மாணவா் தவறி விழுந்ததில் சிகிச்சைப் பலனின்றி உயிரிழந்தாா்.

ஆா்.கே.பேட்டை அடுத்த ராஜநகரம் மேற்கு பகுதியைச் சோ்ந்தவா் திருமுருகன் (15). இவா், அதே பகுதியில் தனியாா் பள்ளியில் பத்தாம் வகுப்பு படித்து பொது தோ்வு எழுதினாா். கடந்த 14-ஆம் தேதி திருமுருகன், திருத்தணி அடுத்த நாபளூா் கிராமத்தில் உள்ள உறவினா் வீட்டிற்கு விடுமுறைக்கு வந்திருந்தாா். மாலை வீட்டின் கூரை மீது இருந்த புறாவை பிடிக்க திருமுருகன் ஏறியபோது தவறி, வீட்டின் அருகே சென்ற மின் கம்பி மீது விழுந்ததில் மின்சாரம் பாய்ந்து பலத்த தீக்காயம் அடைந்தாா்.

இதையடுத்து சென்னை கீழ்ப்பாக்கம் அரசு மருத்துவமனையில் சிகிச்சை பெற்று வந்த நிலையில் சனிக்கிழமை சிகிச்சை பலனின்றி இறந்தாா்.

இது குறித்து கனகம்மாசத்திரம் போலீஸாா் விசாரித்து வருகின்றனா்.