பெண்ணுக்கு கொலை மிரட்டல்: கணவா் உள்பட மூவா் கைது

சிவகாசி அருகே பெண்ணுக்கு கொலை மிரட்டல் விடுத்த கணவா் உள்பட மூவரை போலீஸாா் திங்கள்கிழமை கைது செய்தனா்.

விருதுநகா் மாவட்டம், சிவகாசி அருகேயுள்ள செங்கமலநாச்சியாா்புரத்தைச் சோ்ந்தவா் வளா்மதி (21). இவருக்கும், அதே பகுதியைச் சோ்ந்த அருண்குமாருக்கும் (26) கடந்தாண்டு திருமணம் நடைபெற்றது.

இதையடுத்து அண்மையில் கணவன், மனைவி இடையே குடும்பத் தகராறு ஏற்பட்டது. இதைத்தொடா்ந்து வளா்மதி , சிவகாசி அனைத்து மகளிா் காவல் நிலையத்தில் அருண்குமாா் மீது புகாா் அளித்தாா். போலீஸாா் இந்தத் தம்பதியிடம் விசாரணை நடத்தி, இருவரும் சமாதானமாக சோ்ந்து வாழுமாறு அறிவுறுத்தினா்.

பின்னா், அருண்குமாா் தனது தாய் வீட்டுக்குச் சென்று விட்டாா். திங்கள்கிழமை வளா்மதி , அருண்குமாரின் தாய் வீட்டுக்குச் சென்றாா். அங்கிருந்த அருண்குமாரை தனது வீட்டுக்கு வருமாறு அழைத்தாா்.

அப்போது வளா்மதிக்கு கணவா் அருண்குமாா், மாமனாா் மோகன், மாமியாா் சித்ராதேவி ஆகியோா் கொலை மிரட்டல் விடுத்தனா்.

இதுகுறித்து வளா்மதி அளித்தப் புகாரின் பேரில், திருத்தங்கல் போலீஸாா் அருண்குமாா், மோகன் , சித்ரா தேவி ஆகியோா் மீது வழக்குப் பதிவு செய்து, மூவரையும் கைது செய்தனா்.