பொதுத் துறை நிறுவனங்களை தணிக்கை செய்ய தனியாா் நிறுவனங்களுக்கு ஒப்பந்தம் அளிக்கும் அறிவிப்பை திரும்பப் பெற வேண்டும் என மக்களவை உறுப்பினா் சு. வெங்கடேசன் வலியுறுத்தினாா்.
இதுதொடா்பாக அவா் குடியரசுத் தலைவருக்கு அனுப்பிய கடிதத்தில் தெரிவித்திருப்பதாவது:
அண்மையில் தலைமை தணிக்கையாளா் (சி.ஏ.ஜி) வெளியிட்ட ஒரு ஒப்பந்த அறிவிப்பு அதிா்ச்சியளிக்கிறது. அது பொதுத் துறை, உள்ளாட்சித் துறை தணிக்கையை மேற்கொள்ள, பட்டயக் கணக்கு நிறுவனங்களை விண்ணப்பிக்குமாறு கோரியுள்ளது. கணக்குத் தணிக்கை ஊழியா்களுடன் சோ்ந்து இந்த சி.ஏ. நிறுவனங்கள் தணிக்கை செய்யும் எனத் தெரிவிக்கப்பட்டுள்ளது. இந்தியாவின் உயா்ந்த தணிக்கை அதிகாரியான சி.ஏ.ஜி. இந்திய அரசியலமைப்புச் சட்டத்தால் உருவாக்கப்பட்டவா். அவா் மக்களவைக்கு மட்டுமே கட்டுப்பட்டவா். அவரது பணி, பொதுத் துறை, தன்னாட்சி பெற்ற நிறுவனங்கள், உள்ளாட்சி நிறுவனங்களை தணிக்கை செய்வதே ஆகும். பட்டய தணிக்கையாளா் செய்யும் தணிக்கையும், தலைமை தணிக்கையாளா் செய்யும் தணிக்கையும் ஒன்றல்ல. இந்த நிறுவனங்களைத் தணிக்கை செய்வதில் சி.ஏ.ஜி. துறை அதிகாரிகளின் தனித் திறன் நிபுணத்துவமுடையது. அதேபோல, உள்ளாட்சி தணிக்கையும் சிஏஜியின் தணிக்கை வரம்புக்கு உள்பட்டதாகும். சுருக்கமாக சிஏஜி என்பவரும், அவரது கணக்குத் தணிக்கைத் துறையும், இந்திய மக்களின் நிதியின் பாதுகாவலா்கள் என்றால் மிகையாகாது.
இந்த நிலையில், பல்லாயிரக்கணக்கான கோடி ரூபாய்கள் புரளும், இந்தத் தணிக்கையைத் தனியாா் நிறுவனங்கள் செய்ய அழைப்பது, சிஏஜியிடம் அரசியலமைப்புச் சட்டம் கொடுத்துள்ள கடமையை மீறுவதாகும். மேலும் இந்த நிறுவனங்களிடம் இருக்கும் ரகசிய விவரங்கள், தனியாா் கைகளுக்குப் போய்ச் சேரும் ஆபத்தும் உள்ளது.
சி.ஏ.ஜி. எந்த அரசியல் தலையீடும் இல்லாமல் பணிபுரிய வேண்டும் என்பதால்தான் அம்பேத்கா் இயற்றிய அரசியலமைப்புச் சட்டம், தலைமை தணிக்கையாளரை தனி உரிமையுடன் வைத்தது. அந்த அரசியலமைப்புச் சட்ட விதிகளுக்கு மாறாக சிஏஜியே தனியாரை துணைக்கு அழைப்பது ஆபத்தானது. எனவே சி.ஏ.ஜி. உடனடியாக இந்த நடவடிக்கையைக் கைவிட வேண்டும். இந்தத் துறையின் தனித்துவம் பாதுகாக்கப்பட வேண்டும். அப்போது தான் மக்களின் நிதியைக் காப்பாற்ற முடியும். எனவே தனியாா் சி.ஏ. நிறுவனங்களை அழைத்து வெளியிட்டிருக்கும் அறிவிக்கையை சி.ஏ.ஜி. உடனடியாகத் திரும்பப் பெற அறிவுறுத்த வேண்டும் என்றாா் அவா்.
