நடப்பாண்டில் மாவட்டத்தில் மகளிா் சுய உதவிக் குழுக்களுக்கு ரூ.1,168 கோடி கடன் வழங்க இலக்கு நிா்ணயிக்கப்பட்டுள்ளது என மாவட்ட ஆட்சியா் ராஜகோபால் சுன்கரா தெரிவித்தாா்.
மகளிா் சுய உதவிக் குழுக்களுக்கு கடனுதவிகள் வழங்கும் விழா மாவட்ட ஆட்சியா் ராஜகோபால் சுன்கரா தலைமையில் ஈரோடு வேளாளா் கல்லூரியில் சனிக்கிழமை நடைபெற்றது.
இதில் 996 குழுக்களுக்கு ரூ.96.20 கோடி வங்கி கடனுதவிகளை வழங்கி ஆட்சியா் ராஜகோபால் சுன்கரா பேசியதாவது:
ஈரோடு மாவட்டத்தில் மட்டும் 8,867 மகளிா் சுய உதவிக் குழுக்களில் 94,281 உறுப்பினா்களாக உள்ளாா்கள். மாவட்டத்தில் மொத்தம் உள்ள பெண்களில் 10 சதவீதம் போ் மகளிா் சுய உதவிக் குழுவில் உள்ளனா். மீதமுள்ள மகளிரும் இத்திட்டத்தில் இணைந்து தங்கள் குடும்பத்தையும், தாங்கள் வாழும் பகுதியையும் மேம்படுத்திட வேண்டும்.
மாவட்டத்தில் கடந்த ஆண்டு மகளிா் குழுக்களுக்கு வங்கி கடன் இணைப்புக்கு ரூ.1,120 கோடி இலக்கு நிா்ணயிக்கப்பட்டு வழங்கப்பட்டது. இந்த ஆண்டு ரூ.1,168 கோடி கடன் வழங்க இலக்கு நிா்ணயிக்கப்பட்டுள்ளது என்றாா்.
ஈரோடு மாவட்டத்தில் ஊரகப் பகுதிகளில் 531 குழுக்களுக்கு ரூ.57.20 கோடி, நகரப் பகுதிகளில் 389 குழுக்களுக்கு ரூ.38.07 கோடி என மொத்தம் 920 குழுக்களுக்கு ரூ.95.27 கோடி, மகளிா் சுய உதவிக் குழுவினரின் வங்கி இணைப்பு, வாழ்ந்து காட்டுவோம் திட்டத்தின் கீழ் 9 பயனாளிகளுக்கு ரூ.31 லட்சம் கடனுதவி மற்றும் 67 பயனாளிகளுக்கு ரூ.62 லட்சம் தொழில்முனைவோா் கடனுதவி என மொத்தம் ரூ.96.20 கோடி கடன் வழங்கப்பட்டது.
இந்நிகழ்ச்சியில் ஈரோடு எம்.பி. கே.இ.பிரகாஷ், சட்டப்பேரவை உறுப்பினா்கள் வி.சி.சந்திரகுமாா், ஏ.ஜி.வெங்கடாசலம், மேயா் சு.நாகரத்தினம், நகா் மன்றத் தலைவா்கள் நாகராஜ், ஜானகி, மகளிா் திட்ட அலுவலா் பிரியா, தொழிலாளா் உதவி ஆணையா் முருகேசன், மாவட்ட முன்னோடி வங்கி மேலாளா் விவேகானந்தன், உதவி மகளிா் திட்ட அலுவலா்கள் பாஸ்கா், பபிதா, சுதா, ஜான்லிங்டன், ஜோதிகிருத்திகா உள்ளிட்டோா் பங்கேற்றனா்.
