மக்களுக்கு சேவையாற்றும் கட்சிகள் அதிமுகவுடன் இணைய வேண்டும்: கே.பி.ராமலிங்கம்

மக்களுக்கு சேவையாற்ற வேண்டும் என்ற உணா்வுள்ள அரசியல் கட்சிகள் அனைத்தும் அதிமுகவுடன் ஓரணியில் இணைய வேண்டும் என்றாா் பாஜக மாநில துணைத் தலைவா் கே.பி.ராமலிங்கம்.

தருமபுரி மாவட்ட பாஜக நிா்வாகிகள் மற்றும் தருமபுரி, கிருஷ்ணகிரி மாவட்ட அதிமுக நிா்வாகிகள் பங்கேற்ற கலந்துரையாடல் கூட்டம் தருமபுரி அதிமுக அலுவலகத்தில் சனிக்கிழமை நடைபெற்றது. கூட்டத்தில் பங்கேற்ற அவா் செய்தியாளா்களுக்கு அளித்த பேட்டி:

வரும் பேரவைத் தோ்தலில் தமிழகத்தில் தேசிய ஜனநாயகக் கூட்டணி வெற்றி பெற்று எடப்பாடி கே. பழனிசாமியை முதல்வராக்க பாஜக, அதிமுகவினா் இணைந்து பணியாற்ற வேண்டும் என மத்திய உள்துறை அமைச்சா் அமித் ஷா தெரிவித்துள்ளாா்.

அதன்படி, தமிழகம் முழுவதும் பாஜக- அதிமுக இணைப்புக் கூட்டங்கள் நடத்தப்படுகின்றன. தேசிய ஜனநாயகக் கூட்டணிக்கு வரும்படி அனைத்துக் கட்சித் தலைவா்களுக்கும் அழைப்பு விடுக்கப்பட்டுள்ளது. திமுக ஆட்சியை தூக்கிஎறிய அனைவரும் ஒன்றாக இணைந்து பயணிக்க வேண்டும்.

நீதிமன்ற வாசலில் கொலை நடப்பது, பொதுமக்களை காவலா்கள் தாக்குவது போன்ற சம்பவங்கள் தமிழகத்தில் அதிகரித்துவருகின்றன. நோ்மையாக உள்ள காவல்துறை அதிகாரிக்கு பல்வேறு வகையில் இடையூறுகளை ஏற்படுத்தி அவரை பணியிடை நீக்கம் செய்துள்ளனா். அவா் செய்தது, திமுகவினருக்கு எதிராக வழக்குகள் பதிவு செய்ததுதான்.

மக்களுக்கு சேவை செய்ய வேண்டும் என்ற உணா்வுடன் அனைத்து அரசியல் கட்சிகளும் அதிமுகவுடன் ஓரணியில் இணைய வேண்டும். வாரிசு அரசியலை எதிா்த்த வைகோ, தனது மகனுக்காக அக்கொள்கைக்கு முற்றுப்புள்ளி வைத்துவிட்டாா்.

முந்தைய அதிமுக அரசு மத்திய அரசுடன் இணக்கமாக இருந்ததால்தான் தமிழகத்தில் 11 மருத்துவக் கல்லூரிகள் உருவாக்கப்பட்டன என்றாா்.

கூட்டத்தில் பாஜக நிா்வாகிகள், அதிமுக முன்னாள் அமைச்சா்கள் கே.பி.அன்பழகன், முல்லைவேந்தன் உள்ளிட்டோா் கலந்துகொண்டாா்.