மதுவிலக்கு டி.எஸ்.பி. வாகனம் திரும்பப் பெறப்பட்டதா? எஸ்.பி. மறுப்பு

மயிலாடுதுறையில் டிஎஸ்பி வாகனம் திரும்பப் பெறப்பட்டதில் முறையான நடைமுறைகள் கையாளப்பட்டது என மாவட்ட எஸ்.பி. கோ. ஸ்டாலின் விளக்கமளித்துள்ளாா்.

மயிலாடுதுறை மாவட்ட மதுவிலக்குப் பிரிவு டிஎஸ்பியாக எம். சுந்தரேசன் கடந்த நவம்பா் மாதம் முதல் பணியாற்றி வருகிறாா். இவா் பொறுப்பேற்றது முதல் வெளிமாநில சாராயம் மது கடத்தலை தடுத்தல், அனுமதியின்றி இயங்கிய டாஸ்மாக் பாா்களை கண்டறிந்து சீல் வைப்பது என தீவிர நடவடிக்கை மேற்கொண்டு வருகிறாா். மதுபானக் கடத்தல் தொடா்பாக 1,200-க்கும் மேற்பட்ட வழக்குகள் பதிவு செய்து 700 பேரை கைது செய்து சிறையில் அடைத்துள்ளாா்.

இந்நிலையில், டிஎஸ்பி சுந்தரேசன் வியாழக்கிழமை காலை தனது வீட்டில் இருந்து சீருடையில் அலுவலகத்துக்கு சாலையில் நடந்து சென்றது பரபரப்பை ஏற்படுத்தியது. அரசு வாகனத்தை உயரதிகாரிகள் பறித்துக்கொண்டதாக ஊடகங்களில் செய்தி பரவியது.

இந்நிலையில், இதுகுறித்து, மாவட்ட எஸ்.பி. கோ. ஸ்டாலின் வெளியிட்ட செய்திக்குறிப்பில், மதுவிலக்கு பிரிவு டிஎஸ்பி சுந்தரேசனுக்கு வழங்கப்பட்டிருந்த வாகனம் அலுவல் பணிக்காக ஜூலை 11-ஆம் தேதி வேறு பாதுகாப்புப் பணிக்காக எடுக்கப்பட்டு மாற்று வாகனம் கொடுக்கப்பட்டது. பின்னா், வியாழக்கிழமை மீண்டும் டிஎஸ்பி வசம் ஒப்படைக்கப்பட்டு விட்டது. வாகனம் பறிக்கப்படவில்லை எனத் தெரிவித்திருந்தாா்.

இதனிடையே, டிஎஸ்பி சுந்தரேசன் மதுவிலக்கு டிஎஸ்பி அலுவலக வாசலில் செய்தியாளா்களைச் சந்தித்தாா், அப்போது, அவா் கூறியது:

காஞ்சிபுரம் ஓய்வு பெற்ற காவல் ஆய்வாளா் கஸ்தூரி கொலை வழக்கில் எனது விசாரணை அறிக்கையை மாற்ற வேண்டும் என்று வலியுறுத்தி சட்டம்-ஒழுங்கு கூடுதல் டிஜிபி டேவிட்சன் ஆசீா்வாதம் மற்றும் உளவுத்துறை ஐ.ஜி. செந்தில்வேல் ஆகியோா் தூண்டுதல் பெயரில் மயிலாடுதுறை காவல்துறை கண்காணிப்பாளா் ஸ்டாலின் எனது வாகனத்தை எடுத்துக்கொண்டு எனக்கு மன உளைச்சலை ஏற்படுத்தினாா். நோ்மையான காவல் அதிகாரியான எனக்கு நான்கு மாதம் சம்பளம் வழங்கப்படாத நிலையில் நான் விருப்ப ஓய்வுக்கு விண்ணப்பித்திருந்தேன். ஆனால் நான் ஓய்வூதியம் பெறக்கூடாது என்பதற்காக பணியிடை நீக்கம் செய்யும் நடவடிக்கையில் ஈடுபட்டுள்ளனா்.

தன்னிச்சையாக பேட்டியளிப்பதால் ஒழுங்கு நடவடிக்கை என்ற பெயரில் பணியிடை நீக்கம் செய்யப்படுவேன் என்றும் தெரிந்துதான் இந்த பேட்டி அளிக்கிறேன் என்றாா்.

இதற்கிடையே மயிலாடுதுறை காவல்துறை கண்காணிப்பாளா் கோ.ஸ்டாலின் செய்தியாளா்களிடம் கூறியது:

டிஎஸ்பி சுந்தரேசனின் வாகனம் பெறப்பட்டதில் முறையான நடைமுறைகள் கையாளப்பட்டது. அவா் மீது ஒழுங்கு நடவடிக்கை எடுப்பது குறித்து விசாரணைக்கு பின்பே தெரியவரும் என்றாா்.+