மத்திய அரசின் திட்டங்களை மாநில அரசு அா்ப்பணிப்புடன் செயல்படுத்த வேண்டும்! - பொன். ராதாகிருஷ்ணன்

மத்திய அரசின் திட்டங்களை மாநில அரசு அா்ப்பணிப்புடன் செயல்படுத்த வேண்டும் என்றாா் முன்னாள் மத்திய இணை அமைச்சா் பொன்.ராதாகிருஷ்ணன்.

நாகா்கோவிலில் சனிக்கிழமை செய்தியாளா்களிடம் அவா் கூறியதாவது: பிரதமா் மோடி11 ஆண்டு காலத்தில் எண்ணிலடங்கா சாதனைகளை நிகழ்த்தியுள்ளாா். தகவல் தொழில்நுட்பம், பொருளாதாரம் என அனைத்திலும் உலக நாடுகள் வியக்கும் வகையில் பிரதமா் மோடியின் அரசு இந்தியாவை உயா்த்தியுள்ளது.

நமது நாட்டின் பொருளாதார வளா்ச்சி உலக நாடுகளுக்கு சவால் விடும் வகையில் உயா்ந்துள்ளது. உலக அளவில் இந்தியாவின் பொருளாதார வளா்ச்சி 4 ஆவது இடத்தை அடைந்துள்ளது.

பாகிஸ்தான் மீதான ஆபரேஷன் சிந்தூா் நடவடிக்கை இன்னும் முடியவில்லை. சிந்து நதிநீா் ஒப்பந்தம் நிறுத்தப்பட்டுள்ளது. இது பாகிஸ்தானுக்கு பேரிழப்பாகும். இந்தியாவில் நக்சலைட் நடவடிக்கைகள் தற்போது முழுமையாக கட்டுப்படுத்தப்பட்டுள்ளன.

தமிழக அரசின் சாா்பில் பழனியில் ஏற்கெனவே முருகன் மாநாடு நடைபெற்றது. அது இந்து சமய அறநிலையத் துறையின் சாா்பில் நடைபெற்றது. ஆனால் தற்போது மதுரையில் வரும் 22ஆம் தேதி நடைபெற இருப்பது முருக பக்தா்களால் நடத்தப்படுவதாகும். இந்த மாநாட்டை தமிழக அரசு ஊக்குவிக்க வேண்டும். மாநாடு வெற்றி பெற தமிழக முதல்வா் மு.க.ஸ்டாலின் வாழ்த்து தெரிவிக்க வேண்டும்.

கன்னியாகுமரி மாவட்டத்தில் நான்குவழிச்சாலை மற்றும் இரட்டை ரயில் பாதை திட்டம் நிறைவடையும் பட்சத்தில் மாவட்டம் புதுப்பொலிவு பெறும். மத்திய அரசின் திட்டங்களை மாநில அரசு அா்ப்பணிப்புடன் செயல்படுத்த வேண்டும் என்றாா் அவா்.

பேட்டியின் போது, மாவட்ட பாஜக தலைவா்கள் கோபகுமாா் (குமரி கிழக்கு), ஆா்.டி.சுரேஷ் (குமரி மேற்கு), மாவட்ட பொருளாளா் பி.முத்துராமன், மகளிா் அணி மாவட்ட துணைத்தலைவி அபிராமி, மாநகராட்சி உறுப்பினா் சுனில்குமாா் உள்பட பலா் உடனிருந்தனா்.