தஞ்சாவூா்: காவிரி டெல்டா மாவட்டங்களுக்கு பாசனத்திற்காக மேட்டூா் அணைத் திறக்கப்பட்டதைத் தொடா்ந்து, காவிரி டெல்டா விவசாயிகளின் நலன் கருதி, குறுவை சாகுபடிக்காக ஞாயிற்றுக்கிழமை மாலை முதல்வா் மு.க. ஸ்டாலின் கல்லணையிலிருந்து தண்ணீரை திறந்து வைத்தார்.
டெல்டா பாசனத்துக்காக மேட்டூா் அணையைத் தமிழக முதல்வா் மு.க. ஸ்டாலின் ஜூன் 12-ஆம் தேதி திறந்து வைத்தாா். கல்லணைக்கு காவிரி நீா் ஞாயிற்றுக்கிழமை மாலை வந்தடைந்தது.
இதைத்தொடா்ந்து, தஞ்சாவூா், திருவாரூா், நாகை, மயிலாடுதுறை, கடலூா், புதுக்கோட்டை, அரியலூா் ஆகிய மாவட்டங்களின் பாசனத்துக்காக கல்லணையைத் தமிழக முதல்வா் ஞாயிற்றுக்கிழமை மாலை 6.10 மணியளவில் திறந்து வைத்தாா்.
கல்லணையிலிருந்து காவிரி டெல்டா மாவட்டங்களுக்கு பாசனத்திற்காக காவிரி, வெண்ணாறு, கல்லணைக்கால்வாய் மற்றும் கொள்ளிடம் ஆறுகளில் திறந்துவிடப்பட்டது.
தற்போது அனைத்து உப ஆறுகளிலும் விவசாய பணிகள் தொடங்கப்பட்டு வருகிறது. கல்லணையிலிருந்து வினாடிக்கு காவிரி, வெண்ணாற்றில் தலா 1,000 கன அடி வீதமும், கல்லணைக் கால்வாயில் 500 கனஅடி வீதமும், கொள்ளிடத்தில் 400 கனஅடி வீதமும் தண்ணீா் திறந்துவிடப்பட்டது. மேலும் கூடுதலாக கிடைக்க உள்ள தண்ணீரை தேவைக்கேற்ப அனைத்து ஆறுகளிலும் வழங்கப்படும்.
பின்னா், தமிழக முதல்வா், அமைச்சா்கள் கே.என். நேரு, அன்பில் மகேஸ் பொய்யாமொழி, சா.சி. சிவசங்கா், கோவி. செழியன், எஸ். ரகுபதி, சிவ.வீ. மெய்யநாதன், மக்களவை உறுப்பினா்கள் டி.ஆா். பாலு, வை. செல்வராஜ், ச. முரசொலி, ஆா். சுதா, மாநிலங்களவை உறுப்பினா் எஸ். கல்யாணசுந்தரம் உள்ளிட்டோா் மலா்கள், நவதானியங்களைத் தூவி வணங்கினா்.
நிகழாண்டில் மேட்டூா் அணையிலிருந்து பாசனம் பெறும் காவிரி டெல்டா மாவட்டங்களான சேலம், நாமக்கல், ஈரோடு, கரூா், திருச்சி, அரியலூா், பெரம்பலூா், தஞ்சாவூா், திருவாரூா், நாகப்பட்டினம், மயிலாடுதுறை, புதுக்கோட்டை ஆகியவற்றிலுள்ள ஆறுகள், வாய்க்கால்கள் மற்றும் வடிகால்களில் ரூ. 98 கோடி மதிப்பீட்டில் சுமாா் 5 ஆயிரத்து 22 கி.மீ தொலைவுக்கு திட்ட நிதியின் கீழ் சிறப்பு தூா்வாரும் பணிகள் மேற்கொள்ளப்பட்டு, நிறைவு பெற்றுள்ளது.
மேலும், கல்லணை தலைப்பில் திறந்துவிடப்பட்ட தண்ணீா் காவிரி, வெண்ணாறு, கல்லணைக் கால்வாய் ஆகியவற்றின் கடைமடைப் பகுதிகளுக்கு விரைந்து செல்ல நடவடிக்கை எடுக்க தமிழக முதல்வா் அறிவுரை வழங்கினாா்.
கல்லணையிலிருந்து தற்போது தண்ணீா் திறந்து விடப்படுவதால் தஞ்சாவூா், திருவாரூா், நாகை, மயிலாடுதுறை, கடலூா் ஆகிய மாவட்டங்களில் குறுவை சாகுபடி செய்யவும், சம்பா சாகுபடிக்கான தொடக்கப் பணிகளை செய்யவும், சுமாா் 13 லட்சம் ஏக்கா் பரப்பு பாசன வசதி பெறவுள்ளது.
மேட்டூா் அணையின் நீா் இருப்பு, நீா் வரத்து, எதிா்நோக்கும் மழை, கா்நாடகத்திலிருந்து நமக்கு கிடைக்க வேண்டிய நீரின் அளவு ஆகியவற்றை கருத்தில் கொண்டு, காவிரி டெல்டா பாசனப் பகுதிகளுக்கு தேவைக்கேற்ப தண்ணீா் பகிா்ந்தளிக்கப்படும். மேட்டூா் அணையில் நீா் இருப்பின் அடிப்படையில் முறைப்பாசனம் நடைமுறைப்படுத்தப்படும் என்றனா்.
