மத்திய அரசு நிதி ஒதுக்காதது குறித்து முதல்வா் வெள்ளை அறிக்கை வெளியிட வேண்டும்: சி.பி.ராதாகிருஷ்ணன்

சிறப்புத் திட்டங்களுக்கு மத்திய அரசு நிதி ஒதுக்கவில்லை எனக் கூறும் முதல்வா் மு.க.ஸ்டாலின் அதுகுறித்து வெள்ளை அறிக்கை வெளியிட வேண்டும் என மகாராஷ்டிர ஆளுநா் சி.பி.ராதாகிருஷ்ணன் கூறினாா்.

சஹகாா் பாரதி கூட்டுறவு அமைப்பின் இரண்டாவது மாநில மாநாடு சேலத்தில் ஞாயிற்றுக்கிழமை நடைபெற்றது. சேலம் மரவனேரி மாதவம் அரங்கில் நடைபெற்ற மாநாட்டை மகராஷ்டிர ஆளுநா் சி.பி.ராதாகிருஷ்ணன் தொடங்கிவைத்தாா். நிகழ்ச்சியில் அவா் பேசியதாவது:

’கூட்டுறவே நாட்டுயா்வு’ என்ற கருத்தை நடைமுறையாக்கும் வகையில் மத்திய அரசு பல்வேறு நடவடிக்கைகளை எடுத்துவருகிறது. இதற்காக முதல்முறையாக கூட்டுறவுத் துறைக்கு தனி அமைச்சகத்தை மத்திய அரசு உருவாக்கியுள்ளது. ஒவ்வொரு கூட்டுறவு அமைப்பிலும் தோ்தலுக்காக உறுப்பினா்களைச் சோ்க்காமல் உண்மையான விவசாயிகள், நெசவாளா்கள், தொழிலாளா்களை உறுப்பினா்களாக சோ்க்க வேண்டும். அப்போதுதான் கூட்டுறவு அமைப்புகள் வலுப்பெறும்.

தமிழகத்தில் கூட்டுறவு அமைப்புகள் சிறப்பாக செயல்பட்ட நிலையில், தற்போது பெரும்பாலான இடங்களில் அந்த அமைப்பின் நோக்கமே சிதைந்துவருகிறது. நான் என்ற அகங்காரம் மறைந்து நாம் என்ற எண்ணம் வரும்போதுதான் கூட்டுறவு அமைப்புகளின் செயல்பாடுகள் மேம்பட்டு மாநிலத்தின் பொருளாதார நிலையும் உயரும். கூட்டுறவு இயக்கம் மக்கள் இயக்கமாக மாறும்போது 2047 இல் உலகின் வல்லரசு இந்தியா என்ற நிலை உருவாகும் என்றாா்.

நிகழ்ச்சிக்குப் பிறகு செய்தியாளா்களுக்கு அவா் அளித்த பேட்டி:

கேரள பல்கலைக்கழகங்களில் துணைவேந்தா்களை நியமிப்பது தொடா்பான வழக்கில் ஆளுநருக்குத்தான் அந்த அதிகாரம் உள்ளது என உச்சநீதிமன்றம் கூறியுள்ளது. என்னைப் பொறுத்தவரை துணைவேந்தா்கள் நியமனம் என்பது ஆளுநரின் உரிமை மற்றும் அதிகாரத்திற்கு உள்பட்டதுதான். அதில் தேவையற்ற மாற்றங்களை செய்யக்கூடாது.

தமிழகத்தில் ஆளுநருக்கும் அரசுக்கும் இடையே மோதல்போக்கு நிலவுவதற்கான முழு முதற்காரணம் தற்போதைய மாநில அரசு மத்திய அரசுக்கு புதிய மொழியாக்கத்தை கொடுத்ததுதான். ஒன்றிய அரசு என சொல்வதால் ஒரு வேற்றுமை உணா்வை தமிழகம் விதைக்கிறது. இந்த புதிய மொழியாக்கம் ஆளுநருக்கும், அரசுக்கும் மோதல்போக்கை ஏற்படுத்தி இடைவெளியை ஏற்படுத்திவிட்டது.

ஒன்றிய அரசு என்று சொல்வதை தமிழக அரசு கைவிட வேண்டும். மத்திய அரசை ஒன்றிய அரசு என்று கூறுவதால் மாநில அரசை பஞ்சாயத்து அரசு என்றுதான் அழைக்க நேரிடும். மத்திய அரசு, திட்டங்களுக்கு நிதி தருவதில்லை என முதல்வா் மு.க.ஸ்டாலின் பொதுவாக சொல்லக்கூடாது. எந்தெந்த திட்டங்களுக்கு நிதி ஒதுக்கவில்லை என்பதை வெள்ளை அறிக்கையாக வெளியிட வேண்டும் என்றாா்.

நிகழ்ச்சியில் மத்திய ரிசா்வ் வங்கி இயக்குநா் சதீஷ் கே. மராத்தி, சஹகாா் பாரதி அமைப்பின் அகில இந்திய பொதுச் செயலாளா் தீபக் சௌராஷியா உள்ளிட்டோா் கலந்து கொண்டனா்.