மன்மோகன் சிங் நினைவகத்துக்கு நிலம் கண்டறியும் பணி தொடக்கம்

முன்னாள் பிரதமா் மன்மோகன் சிங்கின் நினைவகத்துக்கு நிலம் கண்டறியும் பணியை மத்திய அரசு தொடங்கியுள்ளதாகவும் இதுகுறித்து அவரது குடும்பத்தினருடன் அரசு தொடா்பில் உள்ளதாகவும் தகவலறிந்த வட்டாரங்கள் தெரிவித்தன.

மேலும், இதுகுறித்து அவா்கள் கூறுகையில், ‘முன்னாள் பிரதமா் மன்மோகன் சிங்குக்கு நினைவகம் அமைப்பதற்கான விருப்பத்தை குடும்பத்தாரிடம் மத்திய அரசு ஏற்கெனவே தெரிவித்துவிட்டது. நினைவகம் அமைப்பதற்கு முன்னதாக அறக்கட்டளை ஒன்றை அரசு நிறுவ உள்ளது.

இந்திரா காந்தியின் இளைய மகனும், முன்னாள் எம்.பி.யுமான சஞ்சய் காந்தி நினைவகத்துக்கு அருகே சில இடங்களை மத்திய பொதுப்பணித் துறை அதிகாரிகள் பாா்வையிட்டு ஆய்வு செய்தனா். அதன்படி, நினைவகம் அமைப்பதற்கு தோ்வு செய்யப்பட்டுள்ள 4 இடங்கள் குறித்து குடும்பத்தாரிடம் விவாதிக்கப்பட்டது.

ஆனால், அவா்கள் இதுவரை இறுதி முடிவு ஏதும் எடுக்கவில்லை. அனைத்து நினைவகப் பணிகளும் குடும்பத்தினருடனான கலந்தாலோசனைக்குப் பிறகே மேற்கொள்ளப்படுகிறது’ என்றனா்.

இந்தியாவின் முன்னாள் பிரதமரும் காங்கிரஸின் மூத்த தலைவருமான மன்மோகன் சிங் (92) கடந்த டிச. 26-ஆம் தேதி தில்லி எய்ம்ஸ் மருத்துவமனையில் காலமானாா். அவருக்கு நினைவகம் அமைப்பதற்கு ஏதுவான இடத்தில் அல்லாமல் வேறு இடத்தில் ( நிகம்போத் காட் தகனமேடை) இறுதிச் சடங்கு நடத்தி மன்மோகன் சிங்கை அவமதித்துவிட்டதாக காங்கிரஸும் மன்மோகன் இறப்பில் அரசியல் செய்வதாக பாஜகவும் பரஸ்பரம் விமா்சனங்களை முன்வைத்தன.