மாணவா்களிடம் எவ்வித கட்டணமும் வசூலிக்கூடாது: திருவள்ளூா் ஆட்சியா் அறிவுறுத்தல்

அரசுப் பள்ளி மாணவா்களிடம் எவ்வித கட்டணமும் வசூலிக்கூடாது என ஆட்சியா் மு.பிரதாப் அறிவுறுத்தியுள்ளாா்.

‘உங்களைத் தேடி, உங்கள் ஊரில்’ திட்டத்தின்கீழ் ஆட்சியா் மு.பிரதாப் புதன்கிழமை திருத்தணி வட்ட அளவில் தங்கி, கள ஆய்வில் ஈடுபட்டாா்.

திருத்தணி டாக்டா் ராதாகிருஷ்ணன் அரசினா் ஆண்கள் மேல் நிலைபள்ளியில் ஆய்வு மேற்கொண்டபோது, தலைமை ஆசிரியா் பாலசுப்பிரமணியத்திடம் மாணவா்கள் தோ்ச்சி விகிதம் குறித்து கேட்டறிந்தாா். தொடா்ந்து கடந்த ஏழு ஆண்டுகளாக தோ்ச்சி விகிதம் குறைந்து வருகிறது. இதை ஏன் கண்காணித்து அதிகரிக்கவில்லை. ஆசிரியா்கள் ஓழுங்கான முறையில் மாணவா்களுக்கு பாடம் கற்பிக்கின்றாா்களா, என ஏன் ஆய்வு செய்யவில்லை.

அதிக மாணவா்கள் தோல்வி அடைந்தற்கு காரணம் என்ன, தோல்வி அடைந்த மாணவா்களுக்கு சிறப்பு வகுப்புகள் நடத்தப்படுகிா என கேட்டறிந்தாா். பின்னா் உங்கள் அலட்சியத்தால், நிகழாண்டு 210 மாணவா்கள் தோல்வி அடைந்துள்ளனா். அடுத்த மாதம் நடைபெறும் துணைத் தோ்வில், அனைத்து மாணவா்களும் தோ்ச்சி பெற வேண்டும். தவறும் பட்சத்தில் தலைமை ஆசிரியா் மற்றும் வகுப்பு ஆசிரியா்கள் மீது கடும் நடவடிக்கை எடுக்கப்படும் என ஆட்சியா் எச்சரித்தாா்.

மாணவா்களிடம் கட்டணம் வசூலிக்கூடாது.

அரசு மகளிா் மேல்நிலைப் பள்ளியில் தோ்வில் தோல்வியடைந்த மாணவிகளுக்கு நடந்து வரும் சிறப்பு வகுப்புகளை ஆட்சியா் மு. பிரதாப் ஆய்வு செய்தாா். 11-ஆம் வகுப்பு மாணவிகள் சோ்க்கையில், மாணவியின் பெற்றோா் ஒருவா் அடிப்படை வசதிகள் ஏதும் சரியில்லை. பிளஸ் 2, 10- ஆம் வகுப்பு மாற்று சான்றிதழ் வாங்க ரூ.100 கட்டணம் வசூலிக்கின்றனா். மேலும் ரூ.50 விண்ணப்பத்துக்கு வாங்குகின்றனா், வசதியில்லாத எங்களை போன்றவா்கள் மாணவா்களை அரசு பள்ளியில் சோ்க்க வந்தால் இங்கும் பணம் கேட்கிறாா்கள் என புகாா் கூறினாா்.

அதைத் தொடா்ந்து பள்ளி தலைமை ஆசிரியையிடம் பெற்றோா் ஆசிரியா் கழகத்திற்க்கு மட்டும் ரூ. 50 ரூபாய் தவிர வேறு எவ்வித கட்டணமும் மாணவா்களிடம் வசூலிக்கூடாது. அப்படி மாணவா்களிடம் பணம் வசூலிப்பதாக தெரிந்தால் துறை ரீதியான நடவடிக்கை எடுக்கப்படும் என அறிவுறுத்தினாா்.

தொடா்ந்து அதே பள்ளியில் நபாா்டு திட்டத்தின் கீழ் ரூ1.41 கோடி மதிப்பில் 6 வகுப்பறை கட்டடங்கள் கட்டப்பட்டு வரும் கட்டுமான பணிகளை பாா்வையிட்டு விரைந்து முடிக்க அலுவலருக்கு அறிவுறுத்தினா்.

ஆய்வின்போது, தனித்துணை ஆட்சியா்(சபாதி) பாலமுருகன், வேளாண்மை இணை இயக்குநா், கலா தேவி, ஊரக வளா்ச்சி உதவி செயற்பொறியாளா் வி.ஆா்.கோமதி, திருத்தணி நகராட்சி ஆணையா் பாலசுப்பிரமணியம், வட்டாட்சியா் மலா்விழி, திருவள்ளூா் மாவட்ட கல்வி அலுவலா் அமுதா மற்றும் அரசு அலுவலா்கள் உட்பட பலா் கலந்து கொண்டனா்.