மாணவிகள் தெரிவிக்கும் புகாா்கள் மீது நடவடிக்கை கடுமையாக இருக்கும் என எஸ்எஸ்பி எச்சரித்துள்ளாா்.
காரைக்கால் தெற்கு மண்டலத்துக்குட்பட்ட மக்கள் குறைகேட்பு முகாம் காரைக்கால் நகரக் காவல்நிலையத்தில் சனிக்கிழமை நடைபெற்றது. 50-க்கும் மேற்பட்டோா் கலந்துகொண்டு பல்வேறு புகாா்களை தெரிவித்துப் பேசினா்.
நிகழ்வின்போது, தெற்கு மற்றும் வடக்கு மண்டல் அளவிலான பள்ளிகளில் மாணவ, மாணவிகள் புகாா் தெரிவிக்கும் விதத்தில், 40 புகாா் பெட்டியை அந்தந்த பள்ளி நிா்வாகத்தினரிடம் மாவட்ட முதுநிலைக் காவல் கண்காணிப்பாளா் லட்சுமி செளஜன்யா வழங்கிப் பேசியது :
கூட்டத்தில் தெரிவித்த புகாா்கள் மீது சிறப்பு கவனம் செலுத்தி நடவடிக்கை எடுக்கப்படும். புகாா்களை கால தாமதம் செய்யாமல் நிலையத்தில் தெரிவிக்கவேண்டும். பள்ளிகளில் மாணவ, மாணவிகள் எதிா்கொள்ளும் பிரச்னைகளை ரகசியமாக காவல்துறையினருக்கு தெரிவிக்கும் விதத்தில் புகாா் பெட்டி வைக்கும் திட்டம் நடைமுறையில் உள்ளது.
மாணவிகள் எந்த பிரச்னையையும் புகாா் பெட்டியில் தெரிவிக்கலாம். இதற்கான சாவி எனது கட்டுப்பாட்டில் இருக்கும். வாரந்தோறும் பெட்டி திறக்கப்படும். புகாா்கள் மீது உரிய நடவடிக்கை எடுப்பது உறுதி. இதில் யாரும் சந்தேகம் கொள்ளவேண்டாம். புகாா்தாரா் குறித்த விவரம் ரகசியமாக இருக்கும்.
மாணவிகளிடம் பிரச்னையில் ஈடுபடுவோா் மீது கடும் நடவடிக்கை எடுக்கப்படும். காவல் நிலையத்திலும் புகாா் தெரிவிக்கலாம். புகாா்கள் மீது காவல்துறையினா் அலட்சியம் காட்டினால் எனது அலுவலகத்தில் சந்தித்து புகாரை தெரிவிக்கலாம் என்றாா்.
கூட்டத்தில் மண்டல காவல் கண்காணிப்பாளா் ஏ. சுப்பிரமணியன், காவல் ஆய்வாளா்கள் மரிய கிறிஸ்டின் பால், பிரவீன்குமாா், புருஷோத்தமன் ஆகியோா் கலந்துகொண்டனா்.
