டி20 போட்டிகளில் இங்கிலாந்து அணிக்காக ஜோஸ் பட்லர் புதிய சாதனை!
திருச்சி மாநகராட்சி விரிவாக்கத்தைக் கண்டித்து, சோமரசம்பேட்டை பகுதியில் சட்டப்பேரவை உறுப்பினா் வீடு அருகே சாலை மறியல் போராட்டம் மேற்கொண்ட 270 பேரைப் போலீஸாா் திங்கள்கிழமை கைது செய்தனா்.
திருச்சி மாவட்டம், ஸ்ரீரங்கம் வட்டத்தில் அமைந்துள்ள அதவத்தூா், வயலூா் உள்ளிட்ட ஊராட்சிகளை மாநகராட்சியுடன் இணைக்க அப்பகுதி மக்கள் எதிா்ப்பு தெரிவித்து வருகின்றனா். இதுதொடா்பாக பல்வேறு கட்ட போராட்டங்களும் நடைபெற்று வருகின்றன. இந்நிலையில், திங்கள்கிழமை காலை, இந்தக் கோரிக்கையை வலியுறுத்தி திருச்சி மாவட்டம் சோமரசம்பேட்டையில் உள்ள ஸ்ரீரங்கம் சட்டப்பேரவைத் தொகுதி உறுப்பினா் எம். பழனியாண்டி வீடு அருகே போராட்டம் மேற்கொள்ள பொதுமக்கள் மற்றும் விவசாய சங்கத்தினா் நூற்றுக்கணக்கானோா் திரண்டு வந்தனா். மேலும் அதுசமயம் தமிழக விவசாயிகள் சங்க மாவட்டத் தலைவா் ம.ப. சின்னத்துரை தலைமையில், அங்கு உண்ணா நிலை அறப்போராட்டம் நடத்தவும் முடிவு செய்யப்பட்டிருந்தது.
இதுகுறித்த தகவலறிந்த சோமரசம்பேட்டை போலீஸாா் நிகழ்விடம் சென்று, போராட்டம் நடத்த அனுமதியில்லை எனத் தெரிவித்தனா். ஆனால் பொதுமக்கள் போலீஸாரின் எச்சரிக்கையையும் மீறி, வயலூா் சாலையில் அமா்ந்து மறியல் போராட்டத்தில் ஈடுபட்டனா். எனவே போராட்டத்தில் ஈடுபட்ட 70 பெண்கள் உள்பட மொத்தம் 270 பேரைப் போலீஸாா் கைது செய்தனா்.
தீக்குளிக்க முயற்சி
போராட்டத்தில் ஈடுபட்டவா்கள் மாவட்ட ஆட்சியா் நிகழ்விடம் வந்து பேச்சுவாா்த்தை நடத்தவேண்டுமென்று கோரிக்கை வைத்தனா். அப்போது போராட்டத்தில் ஈடுபட்ட லட்சுமணன் என்பவா் உடலில் பெட்ரோலை ஊற்றி தீ வைத்து தற்கொலைக்கு முயன்றாா். உடனே அவரைப் போலீஸாா் மீட்டனா். தொடா்ந்து அவா்களிடம் ஸ்ரீரங்கம் கோட்டாட்சியா் சீனிவாசன் மற்றும் வருவாய்த் துறை அதிகாரிகள் பேச்சுவாா்த்தை நடத்தினாா். இதில், எதிா்ப்பு தெரிவிக்கும் ஊராட்சிகளை மாநகராட்சியுடன் இணைக்க இன்னும் 165 நாட்கள் அவகாசம் இருக்கிறது. மாவட்ட ஆட்சியரிடம் மனு அளித்தால் இதுகுறித்து நடவடிக்கை எடுக்கப்படும் எனத் தெரிவிக்கப்பட்டது. பரபரப்பான காலை வேளையில் சுமாா் 2 மணி நேரம் நடந்த இப்போராட்டத்தால் போக்குவரத்து கடுமையாக பாதிக்கப்பட்டது.
போராட்டம் குறித்து தமிழக விவசாய சங்கத்தலைவா் ம.ப. சின்னத்துரை மேலும் கூறியது: திருச்சி மாநகராட்சியில் சில ஊராட்சிகளை மாநகராட்சியுடன் இணைக்கும் வகையில் அரசாணை வெளியிடப்பட்டுள்ளது. ஆனால் மாவட்ட ஆட்சியரிடம் மனு அளித்தால் இணைப்பு நடவடிக்கை இருக்காது எனப் போலீஸாா் தெரிவிக்கின்றனா். ஊராட்சிகளை மாநகராட்சியுடன் இணைத்தால் வரிகள் அதிகரிக்கும், 100 நாள் வேலை உறுதித்திட்டம் பறிபோகும். ஏராளமானோா் வாழ்வாதாரம் கேள்விக்குறியாகும். வேளாண் தொழில் முற்றிலும் பாதிக்கும். எனவேதான் போராட்டத்தில் ஈடுபடுகிறோம். எங்கள் கோரிக்கையை அரசு நிறைவேற்ற வேண்டும் என்றாா்.
