மிதமான மழை பெய்ய வாய்ப்பு

நாமக்கல் மாவட்டத்தில் லேசானது முதல் மிதமான மழை பெய்வதற்கு வாய்ப்புள்ளதாக வானிலை ஆய்வுமையம் தெரிவித்துள்ளது,

இதுகுறித்து நாமக்கல் கால்நடை மருத்துவக் கல்லூரி வானிலை ஆய்வுமையம் வெள்ளிக்கிழமை வெளியிட்ட செய்திக் குறிப்பு:

கடந்த வார வானிலையை பொருத்தமட்டில், பகல் மற்றும் இரவு நேர வெப்ப அளவுகள் முறையே 98.6, 71.6 டிகிரியாக காணப்பட்டது. அடுத்து வரும் ஐந்து நாள்களுக்கான வானிலையில், வானம் பெரும்பாலும் மேகமூட்டத்துடன் காணப்படும். மாவட்டத்தின் சில இடங்களில் லேசானது முதல் மிதமான மழை எதிா்பாா்க்கப்படுகிறது. பகல் வெப்பம் 89.6 டிகிரிக்கு மிகாமலும், இரவு வெப்பம் 69.8 டிகிரியாகவும் காணப்படும். காற்றின் திசை பெரும்பாலும் தெற்கு மற்றும் கிழக்கிலிருந்து மணிக்கு 10 கி.மீ. வேகத்தில் வீசக்கூடும்.

சிறப்பு ஆலோசனை: கோழியின நோய் ஆய்வகத்தில் இறந்த கோழிகளை பரிசோதனை செய்ததில், பெரும்பாலும் அவை மேல்மூச்சுக்குழல் அயற்சி நோய் மற்றும் மூச்சுக்குழல் நோய் காரணமாக பாதிக்கப்பட்டு இறந்திருப்பது தெரியவந்துள்ளது. மூச்சுக்குழல் நோயைக் கட்டுப்படுத்த கால்நடை மருத்துவரின் ஆலோசனைபடி தீவனத்தில் நோய் எதிா்ப்பு மருந்துகளை கலந்து வழங்குவதுடன், பண்ணைகளில் போதுமான சுகாதார முறைகளை கடைப்பிடிக்க வேண்டும் என தெரிவிக்கப்பட்டுள்ளது.