மீனவா்களின் கோரிக்கைகளை மத்திய, மாநில அரசுகள் கேட்க வேண்டும்: தமிழக வாழ்வுரிமைக் கட்சி

குமரி முதல் கும்மிடிப்பூண்டி வரையுள்ள கடலோரத் தமிழக மீனவா்களை மத்திய, மாநில அரசுகள் அழைத்துப் பேசி, கோரிக்கைகளைக் கேட்டு நிறைவேற்ற வேண்டும் என்றாா் தமிழக வாழ்வுரிமைக் கட்சியின் தலைவா் தி. வேல்முருகன் எம்எல்ஏ.

புதுக்கோட்டை மாவட்டம், கோட்டைப்பட்டினத்தில் செவ்வாய்க்கிழமை நடைபெற்ற வாழ்வுரிமை மீட்புப் பயண ஆா்ப்பாட்டத்தில் பங்கேற்ற அவா் செய்தியாளா்களிடம் கூறியது: தமிழ்நாட்டில் கோரிக்கைகளைக் கேட்டறியப்படாத, ஒருங்கிணைக்கப்படாத சமூகமாக மீனவா்கள் இருக்கின்றனா். கச்சத்தீவை மீட்க வேண்டும். அதற்கு முன்னதாக அந்தத் தீவில் மீனவா்கள் ஓய்வெடுக்கவும், வலைகளை உலா்த்தவும் அனுமதிபெற வேண்டும்.

தமிழக மீனவா்களிடமிருந்து பறிக்கும் படகுகளை இலங்கை அரசு ஏலம் விடுவதை மத்திய அரசு கண்டிக்க வேண்டும். திரும்பப் பெற்றுத் தர வேண்டும். மீனவ மக்களுக்கான நிரந்தரத் தீா்வைத் தருவதற்கு இத்தனை ஆண்டுகாலத்தில் மத்திய அரசு எதுவும் செய்யவில்லை.

தமிழக அரசும் இயந்திரப் படகுகளுக்கு வழங்கும் டீசல் மானிய அளவை உயா்த்தி வழங்க வேண்டும். மீன்பிடித் தடைக்காலத்தில் வழங்கப்படும் உதவித் தொகையை உயா்த்த வேண்டும்.

குமரி முதல் கும்மிடிப்பூண்டி வரையுள்ள தமிழ்நாட்டுக் கடற்கரைப் பகுதியில் வசிக்கும் மீனவா்களை, மத்திய மாநில அரசுகள் அழைத்துப் பேச வேண்டும். அவா்களின் நியாயமான கோரிக்கைகளைக் கேட்டறிந்து, அவற்றை நிறைவேற்ற வேண்டும் என்றாா் வேல்முருகன்.

கோட்டைப்பட்டினம் மீன்பிடி இறங்குதளத்தில் நடைபெற்ற இந்த ஆா்ப்பாட்டத்தைத் தொடா்ந்து, கட்சியினருடன் கடலுக்குள் சில படகுகளில் சிறிதுதொலைவு சென்று முழக்கமிட்டாா் வேல்முருகன். ஆா்ப்பாட்டத்தில், தவாக புதுக்கோட்டை மாவட்டத் தலைவா் நியாஸ் அகமது உள்ளிட்டோா் பங்கேற்றனா்.