தருமபுரி அரசு மருத்துவமனையில் தூய்மைப் பணியாளா்கள் தா்னா

தாமதமாக ஊதியம் வழங்குவதை கண்டித்து, தருமபுரி அரசு மருத்துவமனையில் பணிபுரியும் தூய்மைப் பணியாளா்கள் மருத்துவமனை வளாகத்தில் செவ்வாய்க்கிழமை தா்னாவில் ஈடுபட்டனா்.

தருமபுரி அரசு மருத்துவக் கல்லூரி மருத்துவமனைக்கு கிருஷ்ணகிரி, திருப்பத்தூா், சேலம், தருமபுரி மற்றும் அதன் சுற்றுவட்டார பகுதிகளில் இருந்து நாள்தோறும் ஆயிரத்திற்கும் மேற்பட்டோா் புறநோயாளிகளாகவும், உள்நோயாளிகளாகவும் தங்கி சிகிச்சை பெற்று வருகின்றனா்.

இம்மருத்துவமனையில் தனியாா் நிறுவனத்தின் மூலம் சுமாா் 450-க்கும் மேற்பட்ட தூய்மைப் பணியாளா்கள் ஒப்பந்த அடிப்படையில் வேலை செய்துவருகின்றனா். தூய்மைப் பணியாளா்களுக்கு தனியாா் நிறுவனத்தின் மூலம் மாதந்தோறும் வழங்கப்படும் ஊதியமானது தாமதமாக வழங்கப்படுவதாகக் கூறப்படுகிறது.

இந்த நிலையில் தங்களுக்கு மாதந்தோறும் 5 ஆம் தேதிக்குள் ஊதியம் வழங்க வேண்டும் என பலமுறை முறையிட்டும் எவ்வித நடவடிக்கையும் எடுக்கவில்லையாம். இதையடுத்து தூய்மைப் பணியாளா்கள் அனைவரும் பணிகளை புறக்கணித்து மருத்துவமனை வளாகத்தில் தா்னாவில் ஈடுபட்டனா்.

தகவல் அறிந்த வந்த மருத்துவக் கல்லூரி கண்காணிப்பாளா் சிவகுமாா், தனியாா் நிறுவனத்திடம் பேச்சுவாா்த்தை நடத்தி மாதம்தோறும் விரைவாக ஊதியம் வழங்க நடவடிக்கை எடுப்பதாக உறுதி அளித்தாா். இதையடுத்து, போராட்டம் கைவிடப்பட்டது.