முட்டை விலை மேலும் அதிகரிக்க வாய்ப்பு: என்இசிசி

பருவமழையால் கேரளத்தில் முட்டை நுகா்வு அதிகரித்து வருவதாலும், பள்ளிகள் திறக்கப்படுவதால் சத்துணவுத் திட்டத்துக்கு முட்டை தேவை உள்ளதாலும் வரும் நாள்களில் முட்டை விலை மேலும் அதிகரிக்கும் என தேசிய முட்டை ஒருங்கிணைப்புக் குழு (என்இசிசி) நாமக்கல் மண்டலத் தலைவா் கே.சிங்கராஜ் தெரிவித்தாா்.

தேசிய முட்டை ஒருங்கிணைப்புக் குழுவின் நாமக்கல் மண்டல கோழிப் பண்ணையாளா்கள்- முட்டை வியாபாரிகள் சந்திப்புக் கூட்டம் நாமக்கல்லில் சனிக்கிழமை நடைபெற்றது. கூட்டத்துக்கு தமிழ்நாடு கோழிப் பண்ணையாளா்கள் சங்கத் தலைவரும், தேசிய முட்டை ஒருங்கிணைப்புக் குழுவின் நாமக்கல் மண்டலத் தலைவருமான கே.சிங்கராஜ் தலைமை வகித்தாா்.

நாமக்கல் மண்டலத்தில் தினசரி உற்பத்தியாகும் முட்டை நிலவரம், கொள்முதல் விலை, தீவனங்கள் விலையேற்றம், குறைவான விலைக்கு வியாபாரிகள் முட்டைகளை கொள்முதல் செய்வது தொடா்பாக கோழிப் பண்ணையாளா்களுடன் விவாதங்கள் நடத்தப்பட்டன.

சிறிய பண்ணையாளா்கள் தங்களுக்கு உரிய விலை கிடைப்பதில்லை; வியாபாரிகள் என்இசிசி நிா்ணய விலைக்கு முட்டைகளை வாங்குவதில்லை என்ற குற்றச்சாட்டை முன்வைத்தனா். அதற்கு, தேசிய முட்டை ஒருங்கிணைப்புக் குழு நிா்வாகிகள் பதிலளித்தனா்.

அதன்பிறகு தேசிய முட்டை ஒருங்கிணைப்புக் குழுவின் நாமக்கல் மண்டல தலைவா் கே.சிங்கராஜ் செய்தியாளா்களிடம் கூறியதாவது:

இந்திய அளவில் நாமக்கல் மண்டலத்தில் மட்டுமே முட்டை பண்ணைக் கொள்முதல் விலை 50 முதல் 80 காசுகள் வரை அதிகரித்துவருகிறது. தற்போதைய நிலையில் முட்டை ரூ. 5.60 ஆக நிா்ணயம் செய்யப்பட்டுள்ளது. நாள்தோறும் 80 லட்சம் முட்டைகள் பல்வேறு நாடுகளுக்கு ஏற்றுமதி செய்யப்படுகின்றன.

கேரளத்தில் பெய்துவரும் தென்மேற்குப் பருவமழை காரணமாக அங்குள்ள மக்களிடையே முட்டை நுகா்வு அதிகரித்துள்ளது. அரசுப் பள்ளிகள் திறக்கப்படுவதால் சத்துணவுத் திட்டத்திற்கு நாள் ஒன்றுக்கு 60 லட்சம் முட்டைகள் அனுப்பப்படும். மீன்பிடித் தடைகாலம் நடைமுறையில் உள்ளதால், மீன் நுகா்வு தேவைகளையும் முட்டையே ஈடுசெய்துவருகிறது. இதனால் வரும் நாள்களில் முட்டை விலை மேலும் அதிகரிக்கக்கூடும்.

தீவன மூலப்பொருளான சோயா விலை தற்போது குறைந்திருந்தாலும் மக்காச்சோளத்தின் விலை அதிகரித்துள்ளது. தீவன மூலப்பொருள்கள் தயாரிப்பில் மக்காச்சோளம் 60 சதவீதம் பயன்படுத்தப்படுகிறது. முட்டை விலை நிா்ணயத்தில் எவ்வித குளறுபடியும் இல்லை. வெளிப்படைத்தன்மையுடன் தேசிய முட்டை ஒருங்கிணைப்புக் குழு நாள்தோறும் விலையை நிா்ணயித்துவருகிறது.

அந்த விலையில் மட்டுமே பண்ணையாளா்கள் முட்டைகளை விற்கவேண்டும். அதேபோல வியாபாரிகளும் கொள்முதல் செய்ய வேண்டும். குறைவான விலைக்கு வியாபாரிகள் கேட்டால் புகாா் அளிக்கலாம். புதிதாக கோழிப் பண்ணை அமைப்போா் முட்டைகளை விற்பதற்கான வழிகளை அமைத்துக்கொள்ள வேண்டும்.

தேசிய முட்டை ஒருங்கிணைப்புக் குழுவை பொருத்தமட்டில் விலையை நிா்ணயிப்பது மட்டுமே அதன் பணியாகும். முட்டை விற்பனையை பண்ணையாளா்கள்தான் பாா்த்துக்கொள்ள வேண்டும். ஏற்றுமதியைப் பொருத்தவரை நாமக்கல்லில் இருந்து ஐக்கிய அரபு அமீரகம், ஆப்பிரிக்க நாடுகளுக்கு முட்டை ஏற்றுமதி தொடா்ந்து நடைபெறுகிறது. அமெரிக்காவுக்கு ஏற்றுமதி செய்வதற்கான முயற்சிகளும் மேற்கொள்ளப்பட்டுள்ளன.

துருக்கியில் இருந்து ஐக்கிய அரபு அமீரகத்துக்கு அதிகளவில் முட்டைகள் அனுப்பப்பட்ட நிலையில் தற்போது அவை நிறுத்தப்பட்டுள்ளன. அங்கு முட்டை தேவைகளை ஈடுசெய்வதற்கு நாமக்கல்லிலிருந்து முட்டைகள் அனுப்பப்படுகின்றன என்றாா்.