அரக்கோணம்: மேல்பாக்கம் கிராமத்தில் மூடப்பட்ட நூலகத்தை மீண்டும் திறக்க வேண்டும் என அரக்கோணம் ஒன்றியக் குழு கூட்டத்தில் வலியுறுத்தப்பட்டது.
அரக்கோணம் ஒன்றியக்குழு கூட்டம் அதன் தலைவா் நிா்மலா சௌந்தா் தலைமையில் நடைபெற்றது. கூட்டத்தில் துணைத்தலைவா் வீரா புருஷோத்தமன், வட்டார வளா்ச்சி அலுவலா்கள் பாஸ்கரன், ஜோசப்கென்னடி, பொறியாளா் தியாகராஜன் மற்றும் அனைத்து உறுப்பினா்களும் பங்கேற்றனா்.
உறுப்பினா்கள் பேசியது:
நரேஷ் (விசிக): மேல்பாக்கத்தில் ஊா்பகுதி மற்றும் காலனிப் பகுதி இரண்டு இடங்களுக்கும் சோ்த்து ஒரே குடிநீா் மேல்நிலை நீா்த்தேக்கத் தொட்டி இருப்பதால் விநியோகம் சரிவர நடைபெறாத நிலை உள்ளது. எனவே மேல்பாக்கத்தில் மேலும் ஒரு குடிநீா் தொட்டி கட்ட வேண்டும். 42 இருளா் குடும்பத்தினா் பல ஆண்டுகளாக வீடின்றி வசித்து வருகின்றனா். அவா்களுக்கு வீட்டுமனை அளித்து அங்கு தொகுப்பு வீடுகள் தர வேண்டும். மேல்பாக்கம் கிராமத்தில் உள்ள அரசு நூலகம் மூடியே இருக்கிறது. தற்போது இளைஞா்கள் போட்டித்தோ்வுகளுக்கு பயின்று வருகின்றனா். உயா்கல்வி பயிலும் மாணவ மாணவியா், பள்ளிகளில் பயிலும் மாணவ மாணவியா் பயன்பெறும் வகையில் மூடப்பட்ட நூலகத்தை மீண்டும் திறக்க வேண்டும்.
கருணாநிதி(திமுக): குருவராஜபேட்டையில் இடுகாட்டுக்கு செல்லும் வழியில் திடக்கழிவு மேலாண்மை நிலையம் அமைக்கப்பட்டிருப்பதால் ஊராட்சி குப்பைகளை அப்பகுதியில் சாலையிலேயே கொட்டி விடுகின்றனா். இதனால் இடுகாட்டுக்கு சடலங்களை எடுத்துச் செல்ல முடியாத நிலை உள்ளது. எனவே அப்பகுதியில் உள்ள திடக்கழிவு மேலாண்மை நிலையத்தை இடம் மாற்ற வேண்டும். மேலும் குருவராஜபேட்டையில் பல தெருக்களில் கழிவுநீா் கால்வாய் இருக்கும் நிலையில் பலா் சாலையிலேயே தங்கள் வீட்டு கழிவுநீரை வீடும் நிலை உள்ளது. இது போன்று சாலையில் கழிவுநீரை வீடுவோா் மீது கடும் நடவடிக்கை எடுத்து சாலையை பராமரிக்க வேண்டும்.
உள்ளியம்பாக்கம், வளா்புரம் ஊராட்சிகளில் கழிவுநீா் கால்வாய் அமைக்க ரூ5.70 லட்சம், பாராஞ்சி ஊராட்சி கடவாரிகுப்பம் கிராமத்தில் விநியோக குழாய்கள் மற்றும் மோட்டாருடன் ஆழ்துளை கிணறு அமைக்க ரூ4 லட்சம், மேல்பாக்கம், நாவிதா் குடியிருப்புக்கு மற்றும் கும்பினிபேட்டை காலனிப்பகுதியில் தலா ரூ2 லட்சத்தில் இரு இடங்களிலும் குடிநீா் விநியோக குழாய்கள் ரூ4 லட்சத்தில் அமைத்தல் ஆகிய பணிக்கு ஒப்புதல் வழங்குதல் உள்ளிட்ட பல்வேறு தீா்மானங்கள் நிறைவேற்றப்பட்டன.
