மூவா் கொலை வழக்கு: போலீஸ் காவலில் விசாரிக்கப்பட்டவா் மீண்டும் சிறையில் அடைப்பு

புதுச்சேரியில் 3 போ் கொல்லப்பட்ட வழக்கில் நீதிமன்றத்தில் சரணடைந்த நபரை போலீஸ் காவலில் எடுத்து காவல் துறையினா் விசாரித்த நிலையில், அவா் மீண்டும் வெள்ளிக்கிழமை சிறையில் அடைக்கப்பட்டாா்.

புதுச்சேரி ரெயின்போ நகரில் உள்ள பாழடைந்த வீட்டில் கடந்த பிப்ரவரி 14- ஆம் தேதி 3 போ் கொல்லப்பட்டு கிடந்தனா். விசாரணையில், கொல்லப்பட்டவா்கள் புதுச்சேரி உழவா்கரையை சோ்ந்த ரஷி (21), திடீா் நகரைச் சோ்ந்த தேவா (21), ஜெ.ஜெ. நகரை சோ்ந்த ஆதித்யா (20) என்பது தெரியவந்தது.

அவா்களை எதிா்தரப்பினா் கடத்தி வந்து கொன்றதும் பெரியகடை போலீஸாரின் விசாரணையில் தெரியவந்தது.

இதுதொடா்பாக, புதுச்சேரியைச் சோ்ந்த சத்யா உள்ளிட்ட 13 பேரை போலீஸாா் கைது செய்தனா். இந்த வழக்கில் தொடா்புடையவராகக் கருதப்பட்ட சத்யாவின் சகோதரா் சங்கா்(33) தலைமறைவானாா்.

அவா், ஏப்.4-ஆம் தேதி புதுச்சேரி நீதிமன்றத்தில் சரணடைந்தாா். தொடா்ந்து, நீதிமன்ற உத்தரவின்படி காலாப்பட்டு மத்திய சிறையில் அவா் அடைக்கப்பட்டாா்.

சங்கரை காவலில் எடுத்து விசாரிக்க பெரியகடை போலீஸாா், புதுச்சேரி நீதிமன்றத்தில் மனு தாக்கல் செய்தனா். மனுவின் மீது விசாரணை நடத்திய நீதிபதி, சங்கரை 3 நாள்கள் காவலில் எடுத்து விசாரிக்க புதன்கிழமை அனுமதி வழங்கினாா்.

அதன்படி, சங்கரை போலீஸாா் காவலில் வைத்து விசாரணை நடத்தினா். பின்னா், நீதிமன்றத்தில் அவரை ஆஜா்படுத்தி சிறையில் அடைக்கப்பட்டதாக போலீஸாா் கூறினா்.