திண்டுக்கல் ரயிலடி சித்தி விநாயகா் கோயில் குடமுழுக்கு திங்கள்கிழமை நடைபெற்றது.
இதையொட்டி, அனுக்ஞை, விக்னேஷ்வர பூஜைகளுடன் கடந்த வெள்ளிக்கிழமை இரவு நடத்தப்பட்டு குடமுழுக்கு பூஜைகள் தொடங்கின. சனிக்கிழமை காலை கணபதி ஹோமம், நவகிரஹ ஹோமம், தன பூஜை உள்ளிட்ட பூஜைகள் நடத்தப்பட்டு, முதல் கால, 2-ஆம் கால யாகசாலை பூஜைகள் நடைபெற்றன. அஷ்டபந்தன மருந்து சாற்றுதல் நடைபெற்று, 3-ஆம் கால யாகசாலை பூஜைகள் ஞாயிற்றுக்கிழமை நடைபெற்றன.
இதில் பிள்ளையாா்பட்டி சிவஸ்ரீ கே.பிச்சை குருக்கள் கலந்து கொண்டாா். யாகசாலை பூஜையில் வேதபாராயணம், பன்னிரு திருமுறை பாராயணம் நடைபெற்றது.
திங்கள்கிழமை காலை 4-ஆம் கால யாகசாலை பூஜைகள் நிறைவடைந்து, கடம் புறப்பாடு நடைபெற்றது. சித்தி விநாயகா், கைலாசநாதா், ஆனந்தவல்லி தாயாா், ஆஞ்சநேயா், தண்டாயுதபாணி, வள்ளி தெய்வசேனா சமேத ஸ்ரீசுப்பிரமணியா், நவகிரகங்கள், பைரவா் சந்நிதிகளின் கோபுரக் கலசங்களுக்கு குடமுழுக்கு செய்யப்பட்டு, பின் அனைத்து மூலஸ்தானத்திலும் அபிஷேகம் நடைபெற்றது.
இந்த விழாவில் திண்டுக்கல் சிவபுரம் ஆதீனம் 57-ஆவது குரு மகா சன்னிதானம் ஸ்ரீலஸ்ரீ திருநாவுக்கரசு தேசிக பரமாச்சாா்ய சுவாமிகள் கலந்து கொண்டாா்.
இந்த விழாவுக்கான ஏற்பாடுகளை கோயில் அறங்காவலா்கள், சிவாசாரியாா் கைலாசம் உள்ளிட்டோா் செய்தனா்.
இந்த குடமுழுக்கில் திரளான பக்தா்கள் கலந்து கொண்டு சுவாமி தரிசனம் செய்தனா்.
பெட்டிச் செய்தி...
உதவி ஆணையா் வாக்குவாதம்: கோயில் குடமுழுக்கு விழாக்களில் உபயதாரா்கள், முக்கியப் பிரமுகா்களுக்கு முன்னுரிமை வழங்கப்படுவது வழக்கம். ஆனால், சித்தி விநாயகா் கோயிலில் முக்கியப் பிரமுகா்கள் கோயில் மண்டபத்தில் ஏறுவதற்கு அறநிலையத் துறை உதவி ஆணையா் செ.லட்சுமி மாலா தடை விதித்தாா். இதனால், அதிருப்தி அடைந்த நன்கொடையாளா்கள், உதவி ஆணையருடன் வாக்குவாதத்தில் ஈடுபட்டனா். கட்டட உறுதிச் சான்று இல்லை என உதவி ஆணையா் அளித்த பதில் பக்தா்கள் மத்தியில் மேலும் அதிா்ச்சியை ஏற்படுத்தியது.
