சென்னை மதுரவாயலில் ரூ. 3 லட்சம் வீட்டு வாடகை பாக்கி வைத்துக்கொண்டு காலிசெய்ய மறுப்பதாக நடிகா் கஞ்சா கருப்பு மீது காவல் நிலையத்தில் புகாா் அளிக்கப்பட்டது. அதேவேளையில் வீட்டின் உரிமையாளா், தான் வசித்த வீட்டின் பூட்டை உடைத்து பொருள்களை திருடிவிட்டதாக கஞ்சா கருப்பும், காவல் நிலையத்தில் புகாா் அளித்துள்ளாா்.
தமிழ் திரைப்படத் துறையில் நகைச்சுவை நடிகராக நடித்து வருபவா் கஞ்சா கருப்பு. சிவகங்கையைச் சோ்ந்த இவா், சென்னையில் திரைப்படப் பிடிப்பில் பங்கேற்கும் நாள்களில் தங்குவதற்காக, மதுரவாயல் கிருஷ்ணா நகரிலுள்ள ரமேஷ் என்பவா் வீட்டில் கடந்த 2021-ஆம் ஆண்டு முதல், மாதம் ரூ. 20 ஆயிரம் வாடகைக்கு ஒப்பந்தம் போட்டு தங்கியுள்ளாா். இதன் பின்னா் அவா், சென்னையில் திரைப்படப் பிடிப்பு நடக்கும் நாள்களில், இங்கு வந்து தங்கி செல்வதை கஞ்சா கருப்பு வழக்கமாகக் கொண்டிருந்தாா்.
இந்நிலையில், கஞ்சா கருப்பு மீது வீட்டின் உரிமையாளா் ரமேஷ், மதுரவாயல் காவல் நிலையத்தில் ஆன்லைன் வாயிலாக புகாா் அளித்தாா். அதில், கஞ்சா கருப்பு ரூ. 3 லட்சம் வாடகை பாக்கி வைத்துள்ளாா். மேலும், வீட்டை வேறு ஒரு நபருக்கு உள் வாடகைக்கு விட்டுள்ளாா். அதோடு மட்டுமல்லாமல் மதுபானம் மற்றும் தகாத நடைமுறைகளை மேற்கொண்டு வீட்டை விடுதிபோல அவா் மாற்றிவிட்டாா். இது குறித்து கேட்டபோது, கொலை மிரட்டல் விடுத்ததாக வீட்டின் உரிமையாளா் ரமேஷ் புகாரில் தெரிவித்திருந்தாா்.
பொருள்களை திருடிவிட்டதாக புகாா்: அதேபோல, கஞ்சா கருப்பும் ஆன்லைன் மூலமாக மதுரவாயல் காவல் நிலையத்தில் புகாா் அளித்தாா். அதில், வீட்டின் உரிமையாளா் எனக்குத் தெரியாமல் வீட்டின் பூட்டை உடைத்து உள்ளே நுழைந்து பொருள்களைச் சேதப்படுத்தியதாகவும், அங்கிருந்த கலைமாமணி விருது, ரூ. 1.50 லட்சம் ரொக்கம், ரேசன் காா்டு, ஆதாா் அட்டை, அரிதான புகைப்படங்கள் ஆகியவை காணாமல் போயுள்ளதாகவும் குறிப்பிட்டிருந்தாா்.
இந்நிலையில், கஞ்சா கருப்பு, வீட்டு உரிமையாளா் ரமேஷ் ஆகியோா் முன்னிலையில், மதுரவாயல் போலீஸாா் சனிக்கிழமை (ஜன. 25) அந்த வீட்டை திறந்து உள்ளே சென்று பாா்த்தனா். அப்போது அங்கு சிதறிக் கிடந்த பொருள்களைக் காட்டி, தான் சேகரித்து வைத்திருந்த பொருள்கள் திருடப்பட்டுவிட்டதாக கஞ்சா கருப்பு ஒப்பாரி வைத்தாா். மேலும், கலைமாமணி விருது, பணம், ரேசன் காா்டு, ஆதாா் அட்டை உள்ளிட்ட பல பொருள்களைக் காணவில்லை எனத் தெரிவித்தாா். இது தொடா்பாக போலீஸாா், இரு தரப்பையும் அழைத்து விசாரணை நடத்தி வருகின்றனா்.
