ரோஹிணியில் தரைக்கடியில் 24 மணிநேரம் செயல்படும் துப்பாக்கி சுடும் தளம்: முதல்வா் அதிஷி திறந்துவைத்தாா்

தில்லியின் ரோஹிணியில் உள்ள தேசிய கேடட் காா்ப்ஸ் (என்சிசி) பவனில் தரைக்கடியில் அமைக்கப்பட்டுள்ள துப்பாக்கிசுடும் தளத்தை தில்லி முதல்வா் அதிஷி செவ்வாய்க்கிழமை திறந்து வைத்தாா்.

த்தளம் நகரின் என்சிசி மாணவா்களுக்கு நவீன பயிற்சி வசதிகளை வழங்கும் வகையில் அமைக்கப்பட்டுள்ளது. இந்த நிகழ்வில் முதல்வா் அதிஷி பேசியதாவது:

இந்த துப்பாக்கி சுடும் தளமானது அதிநவீனமான வகையிலான குறித்துவைத்து சுடக்கூடிய அமைப்புமுறைகளையும், நவீன உபகரணங்களையும் கொண்டுள்ளது. இது ஆண்டு முழுவதும் 24 மணி நேரமும் செயல்படும்.

இந்த வசதி தேசிய மாணவா் படையினா் பயிற்சி செய்வதற்கும் அவா்களின் திறன்களை மேம்படுத்துவதற்கும் தடையில்லா வாய்ப்புகளை வழங்கும்.

ஒலிம்பிக் பதக்க வீராங்கனை மனு பாக்கா் போன்று அடுத்த ஒலிம்பிக் பதக்கத்தை நமது தேசிய மாணவா் படையின் (என்சிசி) மாணவா் ஒருவா் வெல்வாா் என்று நான் நம்புகிறேன்.

விளையாட்டுப் பயிற்சிக்கான செலவு என்பது பெரும்பாலும் மிகவும் அதிகமாக இருக்கிறது. இது பலருக்கு கட்டுப்படியாகாததாகவும் உள்ளது. பல திறமையான இளைஞா்கள் உள்ளபோதும், அவா்களின் பெற்றோா்கள் தொழில்முறை பயிற்சியின் செலவை தாங்கிக்கொள்ள முடியாத நிலையில் உள்ளனா்.

இந்த துப்பாக்கிசுடும் தளமானது தில்லியின் விளையாட்டு வீரா்கள், குறிப்பாக நிதி நெருக்கடியை எதிா்கொள்பவா்கள், அவா்களின் கனவுகளைத் தொடர தரமான பயிற்சியைப் பெற உதவும். இளம் மனங்களை வடிவமைப்பதில் என்சிசி-க்கு முக்கியப் பங்கு உண்டு.

தேசத்திற்கு பங்களிக்கும் வகையில் இளைஞா்களை ஊக்குவிப்பதற்காக என்.சி.சி. நிறுவப்பட்டது. என்.சி.சி.யின் குறிக்கோள் குழந்தைகளிடையே தேசபக்தியை வளா்ப்பதாகும். இது நமது இளைஞா்களுக்கான தில்லி அரசாங்கத்தின் நோக்கத்துடன் ஒத்துப்போகிறது என்றாா் அதிஷி.