வடபழனி முருகன் கோயிலுக்கு வெடிகுண்டு மிரட்டல்... சிக்கிய அரசு ஊழியர் - என்ன நடந்தது?

சென்னை வடபழனியில் உள்ள முருகன் கோயிலுக்கு தினமும் ஏராளமான பக்தர்கள் வருவதுண்டு. கடந்த 30.12.2024-ம் தேதி காவல் கட்டுப்பாட்டறையை தொடர்பு கொண்ட ஆண் ஒருவர், வடபழனி முருகன் கோயிலில் வெடிகுண்டு இருப்பதாகக் கூறி விட்டு போன் இணைப்பைத் துண்டித்தார். இதையடுத்து வெடிகுண்டு நிபுணர்களுடன் சென்ற போலீஸார் வடபழனி கோயிலில் சோதனை நடத்தினர். ஆனால் வெடிகுண்டுகள் எதுவும் சிக்கவில்லை. வெடிகுண்டு மிரட்டல் புரளி என தெரியவந்ததால் போலீஸார் நிம்மதியடைந்தனர். இருப்பினும் வெடிகுண்டு மிரட்டல் விடுத்தவர் யாரென்று போலீஸார் விசாரித்தனர்.

காவல் கட்டுப்பாட்டறைக்கு வந்த செல்போன் நம்பரைக் கொண்டு வடபழனி போலீஸார் விசாரணை நடத்தினர். தேனாம்பேட்டை உதவி கமிஷனர் ஆரோக்கிய ரவிந்திரன், வடபழனி குற்றப்பிரிவு இன்ஸ்பெக்டர் அமுதா தலைமையில் போலீஸார் நடத்திய விசாரணையில் செல்போன் நம்பர் மூலம் கிடைத்த முகவரியில் மிரட்டல் விடுத்த நபர் குடியிருக்கவில்லை. மேலும் அவர் அந்த வீட்டை காலி செய்துவிட்டு வேறு இடத்துக்கு சென்ற தகவலும் தெரியவந்தது. அதனால் மிரட்டல் விடுத்த நபரைப் பிடிக்க போலீஸார் அடுத்த ஆக்ஷனில் இறங்கினர். மிரட்டல் விடுத்த நபரின் தொடர்புகளை விசாரித்தனர். அப்போது அவர், தனியார் வங்கியில் அக்கவுண்ட் வைத்திருக்கும் தகவல் கிடைத்தது. உடனடியாக அந்த வங்கிக்குச் சென்ற போலீஸார், அந்த நபரின் போன் நம்பர் அடிப்படையில் அவரின் முகவரியையும் புகைப்படத்தையும் பெற்றனர். தரமணியில் குடியிருந்த அந்த நபரின் வீட்டுக்குச் சென்று போலீஸார் கதவைத் தட்டியதும் எந்தவித பதற்றமும் இல்லாமல் அந்த நபர் கதவைத் திறந்தார். இதையடுத்து அந்த நபரை போலீஸார் பிடித்து விசாரித்தனர். விசாரணையில் அவரின் பெயரில் விவேக் மாறன் (35) என்றும் இவர், அரசு பாலிடெக்னிக் கல்லூரியில் இளநிலை உதவியாளராக வேலை செய்து வருவதும் தெரியவந்தது. மேலும் இவர், சம்பவத்தன்று குடிபோதையில் வெடிகுண்டு மிரட்டல் விடுத்த தகவலும் தெரியவந்தது. தொடர்ந்து விவேக் மாறனிடம் போலீஸார் விசாரணை நடத்தி வருகின்றனர். விவேக் மாறனின் நடவடிக்கைகள் பிடிக்காததால் அவரின் மனைவி பிரிந்துச் சென்றுவிட்டார். தனிமையால் இதுபோன்ற செயல்களில் விவேக் மாறன் ஈடுபடுவதாக போலீஸார் தெரிவித்தனர்.