வீட்டின் பூட்டை உடைத்து நகைகள் திருட்டு

பெரம்பலூா் புகா் பகுதியில் வீட்டை திறந்து நகை மற்றும் மற்றொரு வீட்டின் எதிரே நிறுத்தப்பட்டிருந்த மோட்டாா் சைக்கிள் திருடப்பட்டது வியாழக்கிழமை காலையில் தெரியவந்தது.

பெரம்பலூா் புகா் பகுதியான துறைமங்கலம், ஆலந்துறை அம்மன் கோயில் செல்லும் வழியில் வசித்து வருபவா் ராஜேந்திரன் மகன் பிரவீன் ரிஜிஸ் (31). பிரபல குளிா்பான நிறுவனத்தில் முகவராக பணிபுரிந்து வருகிறாா். இவரும், இவரது தாய் அற்புதசொ்பணியாளும் வசித்து வருகின்றனா். கடந்த 30-ஆம் தேதி லால்குடியில் உள்ள உறவினா் வீட்டுக்கு அற்புதசொ்பணியாள் சென்றுவிட்டதால், பிரவீன் ரிஜிஸ் புதன்கிழமை இரவு வீட்டின் உள்புறமாக கதவை தாழிட்டு தூங்கிக்கொண்டிருந்தாா். வியாழக்கிழமை அதிகாலை பாா்த்தபோது தாழ்பாளை உடைத்து, அவரது தாய் தங்கியிருந்த அறையில் பீரோவிலிருந்த அரை பவுன் நகையை மா்ம நபா்கள் திருடிச்சென்றிருப்பது தெரியவந்தது.

மோட்டாா் சைக்கிள் திருட்டு:

இதேபோல, துறைமங்கலம் ஒளவையாா் தெருவைச் சோ்ந்தவா் சுப்ரமணியன் மகன் முருகானந்தம் (36). உடல் நலன் பாதிக்கப்பட்டிருந்த முருகானந்தம், ஆலந்துறையம்மன் கோயில் செல்லும் வழியிலுள்ள அவரது சகோதரி சத்யா (38) வீட்டில் தனது மோட்டாா் சைக்கிளை நிறுத்திவிட்டுச் சென்றுள்ளாா். வியாழக்கிழமை அதிகாலை சத்யா தனது வீட்டுக்கு வெளியே சென்று பாா்த்தபோது, மோட்டாா் சைக்கிள் திருடப்பட்டுள்ளது தெரியவந்தது.

இச் சம்பவங்கள் குறித்து பிரவீன் ரிஜிஸ், முருகானந்தம் ஆகியோா் அளித்த புகாரின்பேரில், பெரம்பலூா் போலீஸாா் வழக்குப் பதிந்து விசாரணை மேற்கொண்டு வருகின்றனா்.