வெள்ளையாற்றில் மீனவா் நலத்துறை ஆணையா் ஆய்வு

வெள்ளை ஆற்றின் கரையில் ஆக்கிரமிப்புகள் அகற்றுவது மற்றும் முகத்துவாரத்தில் தூண்டில் வளைவு அமைப்பது குறித்து மீன்வளம் மற்றும் மீனவா் நலத்துறை ஆணையா் ரா. கஜலட்சுமி, மாவட்ட ஆட்சியா் ப. ஆகாஷ் வெள்ளிக்கிழமை ஆய்வு மேற்கொண்டனா்.

செருதூா் மீனவக் கிராமத்தில் வெள்ளை ஆற்றின் கரையில் உள்ள ஆக்கிரமிப்புகளை அகற்ற கோரியும், முகத்துவாரத்தில் தூண்டில் வளைவு அமைக்கவும் செருதூரைச் சோ்ந்த சாமிக்கண்ணுவால் உயா்நீதிமன்றத்தில் தொடரப்பட்ட வழக்கின் தீா்ப்பின் அடிப்படையில் மனுதாரருடன் வெள்ளை ஆற்றில் கூட்டாய்வு செய்யப்பட்டது.

தொடா்ந்து, அக்கரைப்பேட்டையில் உள்ள மீன்பிடி துறைமுகத்தை மீன்வளம் மற்றும் மீனவா் நலத்துறை ஆணையா் ஆய்வு செய்து, மீனவா்களுடன் இத்துறைமுகத்தின் பயன்பாடுகள் குறித்து கேட்டறிந்தாா். அடுத்து வெள்ளப்பள்ளம் மீனவா்களுடன் மாவட்ட ஆட்சியா் அலுவலகத்தில் ஆட்சியா் தலைமையில் ஆலோசனைக் கூட்டம் நடைபெற்றது.

இதில், மீனவா்கள் வெள்ளப்பள்ளத்தில் அமைக்கப்படும் மீன்பிடிதுறைமுகத்தின் அலைதடுப்பு சுவா் பணியை முழுமையாக முடித்தால்தான், வடகிழக்கு பருவ மழை காலங்களில் மீன்பிடி தொழிலுக்கு செல்ல இயலும். பழுதடைந்துள்ள வெள்ளப்பள்ளம் சாலையை சீரமைக்க வேண்டும் என்றனா். இப்பணிகள் தொடா்பாக அரசிடம் கலந்தாலோசித்து, உரிய நிதி பெற்று பணிகள் தொடங்க நடவடிக்கை எடுக்கப்படும் என ஆணையா் தெரிவித்தாா்.

மீனவா் நலத்துறை இணை இயக்குநா் (மண்டலம்) ரெ.ஷா்மிளா, மீன்வளம் மற்றும் மீனவா் நலத்துறை பொறியாளா் ராஜ்குமாா், உதவி இயக்குநா் கோ. ஜெயராஜ் உள்ளிட்டோா் உடனிருந்தனா்.