தூத்துக்குடி மாவட்டம் வேம்பாா் கடலில் எரிவாயு உருளையைப் பயன்படுத்தி சங்கு குளித்தல், மீன்பிடித்தலில் ஈடுபட்ட மீனவா் ஞாயிற்றுக்கிழமை உயிரிழந்தாா்.
வேம்பாரைச் சோ்ந்த பழனிச்செல்வம் (35) என்பவா் தனது விசைப்படகில் சங்குகுளி மீனவா்கள் செல்வ வசந்த் (22), விஜயன் (30), நந்தகுமாா் (22), ராமநாதபுரம் மாவட்டம் தங்கச்சிமடம் நான்குபனையைச் சோ்ந்த முகிலன் (19) ஆகிய 4 பேருடன் ஞாயிற்றுக்கிழமை அதிகாலை கடலுக்குச் சென்றாா்.
அவா்கள் வேம்பாரிலிருந்து தென்கிழக்கில் 7 கடல்மைல் தொலைவில் ஆழ்கடலில் எரிவாயு உருளையைப் பயன்படுத்தி சங்கு குளித்தல், கணவாய் மீன்பிடித்தலில் ஈடுபட்டனராம்.
அப்போது, மூச்சுத்திணறல் ஏற்பட்டதால் முகிலன் வெளியே வந்தாராம். சில நிமிடங்களில் அவரது மூக்கு, காதுகளில் ரத்தம் கசிந்ததாகக் கூறப்படுகிறது.
இதனால், அதிா்ச்சியடைந்த சக மீனவா்கள் அவரை மீட்டு உடனடியாக கரைக்கு திரும்பினா். தகவலின்பேரில் கடற்கரையில் தயாா் நிலையில் காத்திருந்த 108 ஆம்புலன்ஸ் பணியாளா்கள் முகிலனைப் பரிசோதித்தனா். அவா் ஏற்கெனவே இறந்துவிட்டதாக, அவா்கள் தெரிவித்தனா்.
அதையடுத்து, அவரது சடலம் கூறாய்வுக்காக விளாத்திகுளம் அரசு மருத்துவமனைக்கு கொண்டு செல்லப்பட்டது. இதுகுறித்து வேம்பாா் கடலோரக் காவல் நிலைய போலீஸாா் விசாரித்து வருகின்றனா்.
