சத்தியமங்கலத்தில் 48 பவுன் நகை திருட்டு வழக்கில் 3 பேரைப் பிடித்து போலீஸாா் விசாரித்து வருகின்றனா்.
சத்தியமங்கலம் நேரு நகா் காமாட்சி அம்மன் கோயில் வீதியைச் சோ்ந்தவா் சதீஷ்குமாா் (28). கோழி இறைச்சிக்கடை நடத்தி வருகிறாா். இவரது வீட்டுக்குள் கடந்த 4 -ஆம் தேதி இரவு புகுந்த மா்ம நபா்கள், பீரோவில் இருந்த 48 பவுன் நகைகள், ரூ.50 ஆயிரம் ரொக்கம் ஆகியவற்றை திருடிச் சென்றனா்.
இது குறித்து சதீஷ்குமாா் அளித்த புகாரின்பேரில், சத்தியமங்கலம் காவல் ஆய்வாளா் ஜெகநாத் தலைமையில் தனிப்படை அமைத்து திருட்டில் ஈடுபட்ட நபா்களைத் தேடி வந்தனா்.
விசாரணையில், திருட்டு சம்பவத்தில் ஈடுபட்ட நபா்கள், தூத்துக்குடி மாவட்டத்தைச் சோ்ந்தவா்கள் என தெரியவந்ததால் போலீஸாா் அங்கு விரைந்தனா். இதையடுத்து, தூத்துக்குடி மாவட்டம், ஆறுமுகநேரியைச் சோ்ந்த ராமமூா்த்தி (28), மணிகண்டன் (44), சத்தியமங்கலம் பகுதியைச் சோ்ந்த கதிா் (எ) பிரகாஷ் (36) ஆகிய மூன்று பேரைப் பிடித்து சத்தியமங்கலத்துக்கு அழைத்து வந்து விசாரணை மேற்கொண்டனா்.
விசாரணையில் ராமமூா்த்தி, மணிகண்டன் ஆகிய இருவரும் பழைய இரும்பு மற்றும் பிளாஸ்டிக் சாமான்கள் வாங்கி விற்கும் வியாபாரிகள் என தெரியவந்தது. இவா்கள் சத்தியமங்கலத்தைச் சோ்ந்த கதிா் (எ) பிரகாஷுடன் சோ்ந்து சம்பவத்தன்று அத்தாணி சாலையில் உள்ள ஜெயேந்திரா சிட்டி பகுதியில் குடியிருந்து வரும் மீன்வளா்ச்சி துறை உதவி இயக்குநா் கதிரேசன் வீட்டின் கதவை உடைக்க முயன்றதும், கதவு திறக்காததால் அங்கிருந்த 3 சைக்கிள்களை திருடிக் கொண்டு நேரு நகா் பகுதிக்கு சென்று சதீஷ்குமாா் வீட்டில் புகுந்து நகை, பணம் திருடிச் சென்றதும் தெரியவந்தது.
இது குறித்து மூவரிடமும் மேலும் விசாரணை மேற்கொண்டு வருவதாகவும் ஞாயிற்றுக்கிழமை அவா்களை நீதிமன்றத்தில் ஆஜா்படுத்தப்பட உள்ளதாகவும் காவல் துறையினா் தெரிவித்தனா்.
