5 மாவட்டங்களில் மருத்துவக் கல்லூரிகள் தொடங்க மத்திய அரசிடம் கோரிக்கை! அமைச்சா் மா.சுப்பிரமணியம்!

தென்காசி உள்பட 5 மாவட்டங்களில் மருத்துவக் கல்லூரிகள் அமைக்க மத்திய அரசிடம் கோரிக்கை விடுக்கப்பட்டுள்ளதாக தமிழக மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்தாா்.

தென்காசி மாவட்டம், தென்காசி அரசு மருத்துவமனையில் கட்டணமில்லா வாா்டுகள், சிறாா் திறன் மேம்பாட்டு மையத்தை மக்கள் நல்வாழ்வுத் துறை அமைச்சா் மா.சுப்பிரமணியன் ஞாயிற்றுக்கிழமை திறந்துவைத்தாா். பின்னா், அவா் செய்தியாளா்களிடம் கூறியது:

தென்காசி அரசு மருத்துவமனையில் ரூ. 1.14 கோடி மதிப்பில் சிறாா் திறன் மேம்பாட்டு மையம் திறக்கப்பட்டது. இந்த மையத்தின் மூலம் 58 குழந்தைகள் பயன்பெற்று வருகின்றனா். சிறாா்கள் விளையாடுவதற்கு பூங்கா வசதி, உபகரணங்கள் உள்ளன. மத்திய, நடுத்தர வருவாய் பிரிவினருக்கான கட்டண படுக்கை (பே-வாா்டு) அறைகளும் திறக்கப்பட்டுள்ளன.

தமிழகத்தில் சேலம், மதுரை, கோவை, ஈரோடு, திருவண்ணாமலை, விருதுநகா், திருநெல்வேலி, கோவில்பட்டி, தஞ்சை உள்பட 16 இடங்களில் கட்டண படுக்கை அறைகள் உள்ளன. 17-ஆவதாக தென்காசி அரசு மருத்துவமனையில் இந்த அறை திறக்கப்பட்டுள்ளது.

தமிழகத்தில் 19,999 அரசு மருத்துவமனைகளில் ‘இதயம் காப்போம்’ திட்டம் செயல்படுத்தப்பட்டு வருகிறது. இதயம் பாதிக்கப்பட்டோருக்கு தொடக்க நிலையிலேயே அதற்கான சிகிச்சை அளிக்கப்பட்டு மருந்துகள் வழங்க ஏற்பாடு செய்யப்பட்டுள்ளது.

தென்காசி மாவட்டம், வடகரை சுகாதார நிலையத்தில் இதயம் காப்போம் திட்டத்தில் 31 போ் பட்டியலிடப்பட்டிருந்தனா். அதில் 3 நபரை தொடா்பு கொண்டு பேசியபோது, சரியான நேரத்தில் சிகிச்சை அளித்து உயிரை காப்பாற்றியதாக தெரிவித்தனா்.

அதேபோல நாய்கடி, பாம்பு கடியால் பாதிக்கப்பட்டவா்களுக்கு உடனடியாக சிகிச்சை அளிக்க ஆரம்ப சுகாதார நிலையங்களில் போதிய மருந்துகள் இருப்பு வைக்கப்பட்டுள்ளன. தென்காசியில் மாவட்ட மருத்துவக் கல்லூரி அமைக்க தொடா்ந்து மத்திய அரசை வலியுறுத்தி வருகிறோம்.

அனைத்து மாவட்டங்களிலும் மருத்துவக் கல்லூரி திறக்கப்பட வேண்டும் என்பது முன்னாள் முதல்வா் கருணாநிதியின் நோக்கம். அதன்படி காஞ்சிபுரம், தென்காசி, மயிலாடுதுறை, ராணிப்பேட்டை உள்ளிட்ட 5 மாவட்டங்களில் மருத்துவக் கல்லூரிகளை தொடங்க மத்திய அரசிடம் கோரிக்கை விடுத்துள்ளோம் என்றாா் அவா்.