காஞ்சிபுரத்தில் சிவிஎம் அண்ணாமலை அறக்கட்டளை சாா்பில் நடைபெற்ற தனியாா் வேலைவாய்ப்பு முகாமில் தோ்வு செய்யப்பட்ட 702 பேருக்கு அமைச்சா் ஆா்.காந்தி பணி நியமன ஆணைகளை வழங்கினாா்.
காஞ்சிபுரம் எஸ்எஸ்கேவி மேல்நிலைப்பள்ளியில் சிவிஎம் அண்ணாமலை அறக்கட்டளை சாா்பில் தனியாா் வேலைவாய்ப்பு முகாம் எம்எல்ஏ எழிலரசன் ஏற்பாட்டில் நடைபெற்றது.
காஞ்சிபுரம் எம்பி க.செல்வம், மேயா் எம்.மகாலட்சுமி யுவராஜ், மாநகர செயலாளா் சிகேவி தமிழ்ச்செல்வன் ஆகியோா் குத்து விளக்கேற்றி வேலைவாய்ப்பு முகாமை தொடங்கி வைத்தனா். முகாமில் 75-க்கும் மேற்பட்ட நிறுவனங்களின் மனித வள மேம்பாட்டு அலுவலா்கள் கலந்து கொண்டு தங்களுக்கு தேவையான வேலைநாடுநா்களிடம் நோ்காணல் நடத்தினா்.
காஞ்சிபுரம், ராணிப்பேட்டை, செய்யாறு, வந்தவாசி என பல பகுதிகளிலிருந்து சுமாா் 10 ஆயிரத்துக்கும் மேற்பட்ட வேலைநாடுநா்கள் பங்கேற்றிருந்தனா். இவா்களில் பல்வேறு நிறுவனங்களுக்கு 702 போ் தோ்வு செய்யப்பட்டு அவா்களுக்கு பணி நியமன ஆணைகளை கைத்தறி மற்றும் துணிநூல்துறை அமைச்சா் ஆா்.காந்தி வழங்கினாா்.
முகாமில் குடிநீா் வசதி, நடமாடும் கழிப்பறை வசதி, மருத்துவ முகாம் ஆகியவும் அமைக்கப்பட்டிருந்தன. மாவட்ட ஊராட்சி துணைத் தலைவா் நித்யா சுகுமாா், மாவட்ட திமுக பொருளாளா் சன்பிராண்ட் ஆறுமுகம், பகுதி செயலாளா்கள், அறக்கட்டளை நிா்வாகிகள் கலந்து கொண்டனா்.
