76- ஆவது குடியரசு தினம்: ராமநாதபுரத்தில் 96 பயனாளிகளுக்கு ரூ.55.70 லட்சத்தில் நலத் திட்ட உதவிகள்! -ஆட்சியா் வழங்கினாா்

ராமநாதபுரம், காவல் துறை ஆயுதப்படை மைதானத்தில் ஞாயிற்றுக்கிழமை நடைபெற்ற 76-ஆவது குடியரசு தின விழாவையொட்டி மாவட்ட ஆட்சியா் சிம்ரன்ஜீத் சிங் காலோன் தேசியக் கொடியை ஏற்றிவைத்து 96 பயனாளிகளுக்க ரூ. 55.70 லட்சத்துக்கு நலத் திட்ட உதவிகளை வழங்கினாா்.

இதைத் தொடா்ந்து, தேச ஒற்றுமைக்காக வெண் புறக்கள், மூவா்ண பலூன்களையும் அவா் பறக்க விட்டாா். மேலும் சுதந்திரப் போராட்ட வீரா்களின் வாரிசுகளுக்கு சால்வை அணிவித்தாா். இதன் பிறகு, காவல் துறையில் சிறப்பாகப் பணியாற்றிய 72 போலீஸாருக்கு தமிழக முதல்வரின் பதக்கங்களையும், மாவட்ட அளவில் சிறப்பாகப் பணியாற்றிய 92 காவல் துறையினா், 210 அரசு அலுவலா்களுக்கு நற்சான்றிதழ்களையும், ஆட்சியா் வழங்கினாா்.

இதன் பின்னா், மாற்றுத்திறனாளிகள் நலத் துறை, முன்னாள் படை வீரா் நலத் துறை, கூட்டுறவுத் துறை, வேளாண்மைத் துறை, மகளிா் சுயஉதவிக் குழு கடன், தாட்கோ சாா்பாக முதல்வரின் விரிவான மருத்துவக் காப்பீட்டுத் திட்ட அட்டைகள், கலைஞரின் அனைத்து கிராம ஒருங்கிணைந்த வேளாண் வளா்ச்சித் திட்டம், மாநில வேளாண் வளா்ச்சித் திட்டம், ஆதிதிராவிடா் நலத்துறை, மீன் வளத்துறை ஆகிய துறைகள் மூலம் 96 பயனாளிகளுக்கு ரூ. 55.70 லட்சத்தில் நலத் திட்ட உதவிகளை ஆட்சியா் வழங்கினாா். இதைத் தொடா்ந்து, பள்ளி மாணவ, மாணவிகள் பங்கேற்ற கலை நிகழ்ச்சிகள் நடைபெற்றன.

விழாவில், காவல் துறை துணைத் தலைவா், ராமநாதபுரம் (சரகம்) அபிநவ் குமாா், மாவட்ட காவல் கண்காணிப்பாளா் ஜி. சந்தீஷ், மாவட்ட வருவாய் அலுவலா் இரா. கோவிந்தராஜலு, கூடுதல் ஆட்சியா் (வளா்ச்சி) வீா்பிரதாப் சிங், பரமக்குடி சாா் ஆட்சியா் அபிலாஷா கௌா், உதவி ஆட்சியா் (பயிற்சி) முகமது இா்பான், மாவட்ட வன அலுவலா் ஹேமலதா உள்ளிட்ட பலா் கலந்து கொண்டனா்.