மேகாலயாவில் கடந்த மே மாதம் தேனிலவுக்கு சென்ற ராஜா ரகுவன்சியை அவரது மனைவி தனது காதலன் துணையோடு அடியாட்களை வைத்து கொலை செய்தார். இப்படுகொலை நாடு முழுவதும் பெரும் பரபரப்பை ஏற்படுத்தியது. மத்திய பிரதேச மாநிலம் இந்தூரை சேர்ந்த ராஜா ரகுவன்சி திருமணம் முடிந்த சில நாட்களில் தனது மனைவி சோனம் ரகுவன்சியுடன் மேகாலயாவிற்கு தேனிலவு சென்றார். அங்கு ராஜா ரகுவன்சியை சோனம் தனது அடியாட்கள் மூலம் கொலை செய்து பள்ளத்தில் தூக்கிப்போட்டார். சில நாட்கள் தலைமறைவாக இருந்த சோனம் உத்தரப்பிரதேசத்தில் கைது செய்யப்பட்டார்.
அவரது காதலன் ராஜ் குஷ்வாஹாவும் கைது செய்யப்பட்டுள்ளார். இப்படுகொலை சம்பவத்தை இந்தியில் திரைப்படமாக எடுக்க இயக்குனர் எஸ்.பி.நிம்பவத் முடிவு செய்துள்ளார். படத்திற்கு ஷில்லாங்கில் தேனிலவு(Honeymoon in Shillong) என்று பெயரிடப்பட்டுள்ளது. இப்படத்தை தயாரிக்க ராஜாவின் சகோதரர் சச்சினிடம் அனுமதி வாங்கி இருப்பதாக நிம்பவத் தெரிவித்தார். இது குறித்து அவர் மேலும் கூறுகையில்,''ராஜாவின் திருமணம், தேனிலவு கொலை, கைது போன்ற அம்சங்கங்கள் இடம் பெறும்.
இது போன்ற துரோக சம்பவங்கள் நிறுத்தப்படவேண்டும் என்று பொதுமக்களுக்கு தெரிவிக்கும் நோக்கில் இப்படம் தயாரிக்க இருக்கிறோம். படத்தின் 80 சதவீத பகுதி இந்தூரிலும், 20 சதவீத பகுதி மேகாலயாவிலும் படமாக்க திட்டமிட்டு இருக்கிறோம். படத்திற்கான கதை தயாராகிவிட்டது'' என்றார். இப்படத்திற்கு ஒப்புதல் கொடுத்துள்ள ராஜா ரகுவன்சியின் சகோதரர் சச்சின் இது குறித்து கூறுகையில்,''எங்களது சகோதரனின் மரணத்தை திரைக்கு கொண்டு வராவிட்டால் யார் மீது தவறு என்று தெரியாமல் போய்விடும். அதனால்தான் எங்களது சகோதரனின் மரணத்தை படமாக்க ஒப்புதல் கொடுத்திருக்கிறோம்'' என்றார்.
இது போன்று மற்றொரு சகோதரரான பிபின் இது குறித்து கூறுகையில்,''மேகாலயாவில் என்ன நடந்தது என்ற தகவல் படத்தில் உண்மையாகவும், நேர்மையாகவும் இருக்கவேண்டும் என்று விரும்புகிறோம்''என்று தெரிவித்தார்.
