RSSக்கு கெஜ்ரிவால் கடிதம்... கெஜ்ரிவாலுக்கு பாஜக கடிதம்... டெல்லியில் நடக்கும் கடித விளையாட்டு!

டெல்லியில் சட்டமன்றத் தேர்தலுக்கு இன்னும் ஒரு சில வாரங்களில் அறிவிப்பு வெளியாகவிருக்கிறது. பிப்ரவரியில் அல்லது அதற்கு முன்னதாகவே தேர்தல் நடைபெறக்கூடும் என்று கூறப்படுகிறது. மொத்தம் 70 தொகுதிகளுக்கு நடைபெறும் இந்தத் தேர்தலுக்கு ஆளும் ஆம் ஆத்மி, பா.ஜ.க, காங்கிரஸ் உள்ளிட்ட கட்சிகள் இப்போதே தேர்தல் வேளைகளில் இறங்கிவிட்டன.

இந்தியா கூட்டணியிலிருந்தாலும் தனித்துக் களமிறங்கும் ஆம் ஆத்மி, காங்கிரஸ் ஆகிய கட்சிகள் இப்போதே வேட்பாளர் பட்டியலை வெளியிட்டு வருகின்றன. இந்த நிலையில், ஆர்.எஸ்.எஸ் தலைவர் மோகன் பகவத்துக்கு, டெல்லி முன்னாள் முதல்வரும் ஆம் ஆத்மி கட்சியின் தேசிய ஒருங்கிணைப்பாளருமான கெஜ்ரிவால் கடிதம் எழுதியிருப்பது பா.ஜ.க-விடமிருந்து எதிர்வினையைத் தூண்டியிருக்கிறது.

அந்தக் கடிதத்தில் கெஜ்ரிவால், ``டெல்லி தேர்தலில் பா.ஜ.க-வுக்கு ஆர்.எஸ்.எஸ் வாக்கு சேகரிக்கும் என்று ஊடகங்களில் செய்திகள் வருகின்றனவே அது உண்மையா? சமீப காலங்களில் பா.ஜ.க செய்த தவறுகளை ஆர்.எஸ்.எஸ் ஆதரிக்கிறதா என்பதை உங்களிடமிருந்து தெரிந்து கொள்ள மக்கள் விரும்புகிறார்கள். பா.ஜ.க தலைவர்கள் வெளிப்படையாகவே பணப்பட்டுவாடா செய்து ஓட்டுகளை வாங்குகின்றனர். ஆர்.எஸ்.எஸ் இதை ஆதரிக்கிறதா? பூர்வாஞ்சல் பகுதி ஏழைகள், தலித்துகள் பல ஆண்டுகளாக இங்கு வசித்துவந்த போதிலும், வாக்காளர் பட்டியலிலிருந்து அவர்களின் பெயர்களை நீக்கப் பெரிய அளவில் முயற்சிகள் நடக்கின்றன. இப்படிச் செய்வது இந்திய ஜனநாயகத்துக்குச் சரியானது என்று ஆர்எஸ்எஸ் நினைக்கிறதா?" என்று மோகன் பகவத்திடம் கேள்விகளை அடுக்கினார்.

இதைத் தொடர்ந்து, டெல்லி பா.ஜ.க மாநிலத் தலைவர் வீரேந்திர சச்தேவா, கெஜ்ரிவாலுக்கு ஒரு கடிதம் எழுதியிருக்கிறார். அதில், ``கெஜ்ரிவால் பொய் சொல்வதை நிறுத்திவிட்டு எங்களின் கேள்விகளைப் படிக்க வேண்டும். புதுவருடத்தில் பொய் சொல்வதை கெஜ்ரிவால் நிறுத்திவிடுவார் என டெல்லி மக்கள் நம்புகின்றனர்.

எனவே, தேச விரோத சக்திகளின் நன்கொடைகளை ஏற்க மாட்டோம், டெல்லி மக்களுக்கு கெஜ்ரிவால் பொய்யான வாக்குறுதிகளை அளிக்க மாட்டோம் என இந்தப் புதுவருடத்தில் கெஜ்ரிவால் இந்த உறுதிமொழியை ஏற்க வேண்டும்." என்று வீரேந்திர சச்தேவா வலியுறுத்தியுள்ளார்.

VIKATAN PLAY - EXCLUSIVE AUDIO STORIES

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/MaperumSabaithanil