SAT20 : `சாம்பியன் பட்டம் வென்ற மும்பை கேப்டவுண்' - எல்லா லீகிலும் சாம்பியனான ஒரே அணி

தென்னாப்பிரிக்காவில் நடந்து வந்த SAT20 லீகின் இறுதிப்போட்டியில் சன்ரைசர்ஸ் அணியை வீழ்த்தி மும்பை கேப்டவுண் அணி சாம்பியனாகியிருக்கிறது. இந்த வெற்றி மூலம் மும்பை அணி ஆடி வரும் அத்தனை லீகிலும் சாம்பியன் பட்டத்தை வென்றிருக்கிறது. இந்த சாதனையை வேறெந்த அணியுமே செய்தது இல்லை.

SAT20 லீகின் இந்த சீசனில் மும்பை அணி ஆடிய 10 போட்டிகளில் 7 போட்டிகளை வென்றிருந்தது. 2 போட்டிகளில் தோற்றிருந்தது. ஒரு போட்டியில் முடிவில்லை. முதல் அணியாக ப்ளே ஆப்ஸூக்கு வந்த அந்த அணி முதல் தகுதிச்சுற்றில் பார்ல் ராயல்ஸ் அணியை எதிர்கொண்டது. அந்தப் போட்டியில் 39 ரன்கள் வித்தியாசத்தில் வென்று மும்பை அணி இறுதிப்போட்டிக்கு முன்னேறியது. அதேமாதிரி, சன்ரைசர்ஸ் ஈஸ்டர்ன் கேப் அணி எலிமினேட்டரில் ஜோஹனஸ்பர்க் சூப்பர் கிங்ஸையும் இரண்டாவது தகுதிச்சுற்றில் பார்ல் ராயல்ஸ் அணியையும் வீழ்த்தியது.

இறுதிப்போட்டி ஜோஹனஸ்பர்க் மைதானத்தில் நடந்திருந்தது. மும்பை அணியின் கேப்டன் ரஷீத் கான் தான் டாஸை வென்று முதலில் பேட் செய்யப்போவதாக அறிவித்தார். மும்பை அணி 20 ஓவர்களில் 181 ரன்களை எடுத்திருந்தது. மும்பை அணியின் சார்பில் ரிக்கல்டன், எஸ்டரைசன், டிவால்ட் ப்ரெவிஸ் ஆகியோர் கணிசமான பங்களிப்பைக் கொடுத்திருந்தனர். இவர்களின் ஆட்டத்தால்தான் மும்பை அணி நல்ல ஸ்கோரை எட்டியது. சன்ரைசர்ஸ் அணி ஏற்கனவே 2 முறை சாம்பியன் ஆகியிருக்கிறது. இந்த முறையும் சாம்பியன் பட்டத்தை தட்டி செல்வார்களா என்ற எதிர்பார்ப்பு இருந்தது. ஆனால், அவர்களால் 105 ரன்களை மட்டுமே எடுத்தது.

மும்பை அணியின் கட்டுக்கோப்பான பௌலிங்கில் திணறிவிட்டனர். ரபாடா 4 விக்கெட்டுகளை வீழ்த்த போல்ட் 2 விக்கெட்டுகளை வீழ்த்தினார். மும்பை அணி மிக எளிதாகவே போட்டியை வென்று சாம்பியன் ஆகிவிட்டது.

மும்பை இந்தியன்ஸ் அணி SAT20, ILT20, MLC என தென்னாப்பிரிக்கா, துபாய், அமெரிக்கா ஆகிய நாடுகளின் லீகுகளிலும் அணியை வைத்திருக்கிறது. இந்த அத்தனை லீகுகளிலும் அவர்களின் அணி சாம்பியனும் ஆகியிருக்கிறது. இப்படி ஒரு சம்பவத்தை வேறெந்த அணியும் செய்ததில்லை.