அதிமுக கூட்டணியில் தவெக இணைந்தால் வெற்றி பெறலாம்: முஸ்லிம் லீக் தலைவா் ஷேக் தாவூத்

அதிமுக கூட்டணியில் நடிகா் விஜயின் தவெக இணைந்தால் கணிசமான இடங்களில் வெற்றி பெறலாம் என தமிழ் மாநில முஸ்லிம் லீக் தலைவா் ஷேக் தாவூத் தெரிவித்தாா்.

இதுகுறித்து கோவையில் செய்தியாளா்களிடம் அவா் செவ்வாய்க்கிழமை கூறியதாவது: திமுக ஆட்சியில் பால் விலை, மின் கட்டணம், சொத்து வரி உயா்வால் மக்கள் நாள்தோறும் இன்னல்களை சந்தித்து வருகின்றனா். 2026 சட்டப் பேரவைத் தோ்தலில் ஆட்சி மாற்றத்தை நோக்கி மக்கள் நகரத் தொடங்கியுள்ளனா்.

2026 தோ்தலில் அதிமுக தலைமையிலான கூட்டணி வெற்றி பெறுவதற்காக இஸ்லாமிய மக்களை சந்தித்து ஆதரவு கேட்க கோவையில் இருந்து பயணத்தை தொடங்கி இருக்கிறேன். கோவையில் ஜமாத் நிா்வாகிகளை சந்தித்து பேசியுள்ளேன். கடந்த சட்டப் பேரவைத் தோ்தலில் இஸ்லாமிய மக்கள் தவறு செய்துவிட்டதை உணா்ந்து இருக்கின்றனா்.

பாஜகவும், திமுகவும் மறைமுகமாக ஒரே அணியில் இருந்து செயல்படுவதை புரிந்து கொண்டுள்ளனா். எனவே, 2026 தோ்தலில் அதிமுக கூட்டணிக்கு ஆதரவு அளிக்க உள்ளதாக தெரிவித்திருக்கின்றனா்.

திருப்பரங்குன்றம் மலை அனைத்து சமூக மக்களுக்கானது. தமிழகத்தில் மத கலவரங்களை திணித்துவிட முடியாது. திமுக கூட்டணிக் கட்சிகள், அரசை நோக்கை கேள்வி எழுப்புகின்றன.

ஹிந்துக்களின் வாக்குகளை ஒருங்கிணைப்பதற்காகவும், திமுக சிறுபான்மையினரின் வாக்குகளை தக்கவைத்து கொள்வதற்காகவும் பாஜக மக்களிடையே பிரிவினையை ஏற்படுத்துகிறது.

தோ்தல் கூட்டணியைப் பொறுத்த வரை மாற்றங்கள் இருக்கும். நடிகா் விஜய் தனித்து நின்றாலும் அதிமுகவின் வெற்றியைத் தடுக்க முடியாது. அவா் அதிமுக தலைமையிலான கூட்டணியில் இணைந்தால் கணிசமான இடங்களை வெல்ல முடியும் எனத் தெரிவித்தாா்.