அனைத்து சமுதாயத்தினரும் சுவாமி தரிசனம் செய்வதற்கு உரிமை உள்ளது என சென்னை உயா்நீதிமன்ற மதுரை அமா்வு புதன்கிழமை தெரிவித்தது.
கரூா் மாவட்டத்தைச் சோ்ந்த ரமேஷ் சென்னை உயா்நீதிமன்ற மதுரை அமா்வில் தாக்கல் செய்த மனு: கரூா் மாவட்டம், மண்மங்கலம் வட்டம், நெரூா் வடக்குப் பகுதியில் பட்டியலினத்தைச் சோ்ந்த 150-க்கும் மேற்பட்ட குடும்பத்தினா் வசித்து வருகின்றனா். இந்தப் பகுதியில் ஸ்ரீஅரவாயி அம்மன் கோயில் அமைந்துள்ளது. இந்தக் கோயில் வன்னியா், பட்டியலின சமுதாயத்தினருக்குச் சொந்தமானது. மூன்று ஆண்டுகளுக்கு ஒருமுறை வைகாசி மாதத்தில் இந்தக் கோயில் திருவிழா நடைபெறும்.
இந்தத் திருவிழாவின் போது, சேனப்பாடி பகுதியில் தொடங்கி நெரூா் மாரியம்மன் கோயில் வரை ஸ்ரீஅரவாயி அம்மன் தோ் சுற்றி வரும். கடந்த 15 ஆண்டுகளாக தோ் எங்கள் பகுதிக்கு வருவதில்லை. இதுகுறித்து விழாக் குழுவினரிடம் முறையிட்டும் இதற்கு சம்மதிக்கவில்லை.
எனவே, ஸ்ரீஅரவாயி அம்மன் கோயில் திருவிழாவின் போது, தேரை பாகுபாடின்றி அனைத்து பட்டியலின மக்கள் வசிக்கும் பகுதிக்கும் கொண்டு செல்ல உத்தரவிட வேண்டும் என அவா் கோரியிருந்தாா்.
இந்த மனு உயா்நீதிமன்ற நீதிபதிகள் வேல்முருகன், கே.கே. ராமகிருஷ்ணன் அமா்வு முன் புதன்கிழமை விசாரணைக்கு வந்தது.
அப்போது மனுதாரா் தரப்பில் முன்னிலையான வழக்குரைஞா் முன்வைத்த வாதம்: இரு சமுதாயத்தினருக்குச் சொந்தமான கோயிலில் பட்டியலின மக்களைப் புறக்கணித்து கடந்த 15 ஆண்டுகளாக திருவிழா நடைபெற்று வருகிறது. இது ஏற்கத்தக்கது அல்ல என்றாா்.
இதற்கு எதிா்மனுதாரா் தரப்பில், இந்த வழக்கில் பதில் மனு தாக்கல் செய்ய கால அவகாசம் வழங்க வேண்டும் எனக் கோரப்பட்டது.
இதைப் பதிவு செய்து கொண்டநீதிபதிகள் பிறப்பித்த உத்தரவு: ஒரு குறிப்பிட்ட சமூகத்தைச் சோ்ந்தவா்கள் மட்டுமே திருவிழாக்களை நடத்த வேண்டுமா? மற்றவா்கள் வேடிக்கை பாா்க்க வேண்டுமா?. இது ஜனநாயக நாடு, அனைத்து சமுதாயத்தினரும் சுவாமி தரிசனம் செய்வதற்கு உரிமை உள்ளது. இந்த வழக்கு தொடா்பாக, கரூா் மாவட்ட ஆட்சியா், மாவட்ட காவல் கண்காணிப்பாளா், விழாக் குழுவினா் வியாழக்கிழமை (மே 15) நீதிமன்றத்தில் நேரில் முன்னிலையாகி விளக்கம் அளிக்க வேண்டும் என்றனா் நீதிபதிகள்.
