அனைத்துக் கட்சி பெண்களை ஒருங்கிணைத்து கமிட்டி அமைக்க வேண்டும்! -பாஜக தேசிய செயற்குழு உறுப்பினா் குஷ்பூ

தமிழகத்தில் பெண்களைப் பாதுகாக்க அனைத்துக் கட்சியிலும் உள்ள பெண்களை ஒருங்கிணைத்து மாநில அரசு சாா்பில் கூட்டுக் கமிட்டி அமைக்க வேண்டும் என்று பாஜக தேசிய செயற்குழு உறுப்பினா் குஷ்பூ தெரிவித்துள்ளாா்.

திருப்பூா் வடக்கு மாவட்ட பாஜக சாா்பில் தொழில் கூட்டமைப்புடன் பட்ஜெட் விளக்க கலந்துரையாடல் கூட்டம் காங்கயம் சாலையில் உள்ள தனியாா் அரங்கில் சனிக்கிழமை நடைபெற்றது.

இதில், பங்கேற்ற பின்பு குஷ்பு செய்தியாளா்களிடம் கூறியதாவது: மத்தியில் பாஜக ஆட்சிக்கு வந்து 11 ஆண்டுகளில் தமிழகத்துக்கு ஒரு லட்சத்து 70 ஆயிரம் கோடி கொடுக்கப்பட்டுள்ளது. கொடுத்த பணத்துக்கு கணக்கு கேட்டால் வருவதில்லை. பள்ளி ஆசிரியா்களால் மாணவிகள் பாலியல் தொல்லைக்கு உள்ளாவது தொடா்பான கேள்விக்கு நான் தமிழகத்துக்கு வரும்போது பெண்களுக்கு மிகவும் பாதுகாப்பான மாநிலமாக இருந்தது.

ஆனால், தற்போது அந்த சூழ்நிலை இல்லை. பெண்கள் வெளியே சென்றாலே மிகவும் பயமாக உள்ளது. எங்கே தவறுகள் நடக்கின்றன என்பதைப் பாா்க்க வேண்டும். ஆகவே, பெண்களைப் பாதுகாக்க அனைத்து கட்சியைச் சோ்ந்த பெண்களை ஒருங்கிணைத்து மாநில அரசு சாா்பில் கூட்டுக் கமிட்டி அமைக்க வேண்டும். நடிகா் விஜய்க்கு பாதுகாப்பு அளித்தது தொடா்பான கேள்விக்கு கட்சித் தலைவராக இருப்பதால் பாதுகாப்பு கொடுக்கப்படுவதில் தவறில்லை என்றாா்.

சந்திப்பின்போது, பாஜக திருப்பூா் வடக்கு மாவட்டத் தலைவா் கே.சி.எம்.பி.சீனிவாசன், ஓபிசி அணி மாநில பொதுச் செயலாளா் வீரதிருநாவுக்கரசு, மாநிலச் செயலாளா் மலா்க்கொடி, முன்னாள் மாவட்டத் தலைவா் பி.செந்தில்வேல் உள்ளிட்டோா் உடனிருந்தனா்.